غزہ ،لبنان پر اسرائیلی حملے جاری،مزید 100فلسطینی،2لبنانی شہری شہید

(24 نیوز)غزہ،لبنان میں اسرائیل کی بربریت جاری ہے،تازہ حملوں میں مزید  100 فلسطینی شہید ہو گئے۔لبنان میں جنگ بندی کے باوجود حملے، 2 شہری شہید، 4 زخمی ہوگئے۔

غیر ملکی میڈیا کی رپورٹ کے مطابق غزہ میں اسرائیلی حملوں میں تیزی آگئی ہے، ہفتے کو غزہ پر اسرائیلی حملوں میں کم ازکم 100 فلسطینی شہید ہوگئے جن میں سے 75 فلسطینی بیت لاھیا کی رہائشی عمارتوں پر بمباری میں شہید ہوئے۔

اس کے علاوہ جنوبی غزہ کے شہرخان یونس پر اسرائیل کی بمباری میں17 افرا دشہید ہوئے، اسرائیلی طیاروں نےخان یونس میں 2 مقامات کو نشانہ بنایا،غزہ میں خوراک تقسیم کےدوران اسرائیلی حملے میں 3 امدادی کارکن بھی شہید ہوئے، حملے کے بعد امدادی ادارے نے غزہ میں خوراک تقسیم کا کام بند کر دیا۔

رپورٹ کے مطابق شمالی غزہ میں اسرائیلی محاصرے کے دوران وحشیانہ زمینی اور فضائی حملوں میں 2700 فلسطینی شہید ہو چکے ہیں، غزہ میں فلسطینیوں کو سنگین غذائی بحران کی صورتحال کا سامنا ہے۔ 

دوسری جانب لبنان میں جنگ بندی کے چوتھے روز حزب اللہ کے سربراہ سید نعیم قاسم نے کئی مہینوں کے سرحد پار حملوں اور اسرائیلی افواج کے ساتھ لڑائی کے بعد فتح کا اعلان کر دیا۔

امریکی فوج کی سینٹرل کمانڈ کا کہنا ہے کہ میجر جنرل جیسپر جیفرز کو اسرائیل اور حزب اللہ کے درمیان جنگ بندی کی نگرانی میں مدد کے لیے بیروت میں تعینات کر دیا گیا ہے۔

ضرورپڑھیں:کرم میں پھر حالات بگڑ گئے،انتظامیہ اب تک امن قائم کرنے میں ناکام کیوں ہیں؟حقائق کھل کر سامنے آگئے

 جنگ بندی کے باوجود اسرائیل فوج کے لبنان پر حملے جاری ہیں، اسرائیلی فوج نے وادی بیقاع میں رہائشی عمارتوں کو نشانہ بنایا۔ اسرائیلی حملوں میں دو شہری شہید، چار زخمی ہوگئے ،حزب اللہ نےاسرائیل سے جنگ بندی معاہدے کی پاسداری کا مطالبہ کردیا۔ حزب اللہ رہنما مصظفیٰ عبدل کی شہید بیٹی کی نمازجنازہ بیروت میں ادا کر دی گئی۔

لبنان پر اسرائیلی حملوں میں اب تک 3 ہزار 961 افراد شہید، 16ہزار 520 زخمی ہوئے۔

یاد رہے کہ فلسطین کی وزارت صحت کے مطابق 7 اکتوبر 2023 سے اب تک اسرائیلی حملوں میں 44 ہزار 382 فلسطینی شہید ہوئے جبکہ  اسرائیلی حملوں میں مجموعی طور پر ایک لاکھ 5 ہزار 142 فلسطینی زخمی بھی ہوئے۔