’چھٹی آئی ہے‘۔۔۔ مجھے ووٹ دیں۔۔۔ گیلانی کا اراکان اسمبلی کو خط

(24 نیوز)سابق وزیر اعظم اور پیپلز پارٹی کے رہنما سید یوسف رضا گیلانی نے سینٹ الیکشن میں ووٹ مانگنے کے لئے تمام ارکان قومی اسمبلی کو خط لکھ دیا۔

تفصیلات کے مطابق سید یوسف رضا گیلانی نے خط میں کہا ہے کہ ارکان قومی اسمبلی 3 مارچ کے سینٹ الیکشن کے لئے انہیں اپنا قیمتی ووٹ دیں، آج کئے گئے فیصلے مستقبل کی سمت طے کریں گے۔سابق وزیر اعظم نے خط میں کہا کہ سینیٹ انتخابات میں حصہ لینے کا فیصلہ سوچ سمجھ کر کیا، 1985ء سے پارلیمان کا حصہ ہوں، 4 دہائیوں کا سیاسی سفر سب کے سامنے ہے۔ بطور وزیراعظم حزب اختلاف کیلئے وزیراعظم ہاؤس کے دروازے کھلے رکھے، سینیٹ الیکشن کیلئے یکجہتی کی ضرورت ہے۔ پارلیمان کے تقدس کے لئے اکٹھے ہونا ہے، سیاسی و نظریاتی اختلاف جمہوریت کا حسن ہیں، الیکشن اپنی انا کی تسکین یا کسی حکومت کے خلاف نہیں لڑ رہا۔یوسف رضا گیلانی نے مزید کہا  کہ امید ہے 3 مارچ کو میری زندگی اور کردار کو مدنظر رکھ کر ارکان فیصلہ کریں گے۔