(ویب ڈیسک) معروف گلوکار و اداکار عاصم اظہر نے 29 ویں سالگرہ کو اپنی زندگی کی سب سے بہترین سالگرہ قراردے دیا ۔
عاصم اظہر نے اپنی 29 ویں سالگرہ مدینہ کے سفر کے دوران اپنے والدین کے ساتھ منائی،انہوں نے فوٹو اینڈ ویڈیو شیئرنگ ایپ انسٹاگرام پر مدینہ منورہ سےاپنی چند یادگار تصاویر اور ویڈیوزبھی شیئر کی ہیں۔
معروف گلوکار نے مسجد نبوی ﷺ میں سبز گنبد کا نظارہ کرتے ہوئے نبیٔ کریم حضرت محمد ﷺ پر اپنی خوبصورت آواز میں سلام بھی پیش کیا۔
عاصم اظہر نے اپنی پوسٹ کے کیپشن میں لکھا کہ شکر الحمد للّٰہ! یہ میری زندگی کی سب سے بہترین سالگرہ ہے،عاصم اظہر نے اپنے مداحوں سے محبت کا اظہار کرتے ہوئے لکھا کہ آپ سب کی نیک تمناؤں، دعاؤں اور محبتوں کا شکریہ۔
معروف گلوکار کی اس پوسٹ کو ان کے مداحوں اور شوبز انڈسٹری کی معروف شخصیات کی جانب سے پسند کیا جا رہا ہے اور اُنہیں سالگرہ کی مبارک باد بھی دی جا رہی ہے۔