معروف سٹیج اداکارہ نرگس پر شوہر کا مبینہ تشدد

(وقاض احمد)تھیٹرکی معروف اداکارہ نرگس کوان کے شوہرنے مبینہ تشدد کا نشانہ بنایا ہے۔

پولیس ذرائع کے مطابق اداکارہ نرگس کے بھائی خرم بھٹی نے پولیس ہیلپ لائن پر کال کی، کال پر تھانہ ڈیفنس سی کی پولیس کی نفری اداکارہ کے گھر پہنچ گئی، اداکارہ کے بھائی نے پولیس کو بتایا کہ میری بہن کاشوہرانسپکٹرماجد بشیر روزانہ اسکی بہن پر تشدد کرتا تھا اس نے آج بھی میری بہن کو مارا پیٹا جس پراس کی حالت خراب ہوگئی۔

میڈیا رپورٹس کے مطابق اداکارہ نرگس نے تاحال کارروائی کیلئے پولیس کو درخواست نہیں دی، پولیس کا کہنا ہے کہ درخواست موصول ہونے پر ہی اداکارہ کے شوہر کے خلاف کارروائی کی جائے گی۔

خیال رہے کہ اداکارہ نرگس نے چند برس قبل انسپکٹر ماجد بشیر سے شادی کی تھی، شادی کے بعد اداکارہ نے شوبز کوخیرباد کہہ دیا تھا، اداکارہ نرگس کچھ برس سے ایک بیوٹی سیلون چلا رہی ہیں۔