خیبر پختونخوا میں کورونا سے ایک دن میں سب سے زیادہ اموات

(24نیوز) خیبر پختونخوا میں کورونا وائرس کے وار جاری ہیں، گزشتہ 24 گھنٹوں میں صوبے میں کورونا وائرس سے 35 افراد انتقال کرگئے۔
محکمہ صحت کے پی نے کہا ہے کہ کورونا انفیکشن سے صوبے میں پینتیس افراد جاں بحق ہو گئے ہیں، جبکہ گزشتہ چوبیس گھنٹوں کے دوران وائرس سے مزید 1 ہزار 7 افراد متاثر ہوئے۔محکمہ صحت کے مطابق خیبر پختونخوا میں کورونا وائرس کی صورت حال بگڑتی جا رہی ہے، کورونا وبا کے دوران پہلی بار صوبے میں ایک دن میں وائرس سے اتنی بڑی تعداد میں اموات واقع ہوئی ہیں۔
صوبائی محکمہ صحت کا کہنا ہے کہ ایک دن میں صرف پشاور شہر میں وائرس سے 22 افراد جاں بحق ہوئے، صوبے میں کورونا سے جاں بحق افراد کی مجموعی تعداد بڑھ کر 2417 ہوگئی ہے۔
واضح رہے کہ خیبر پختون خوا میں پہلی بار ایک دن میں اتنی تعداد میں اموات ریکارڈ ہوئی ہیں، پہلی اور دوسری لہر کے دوران صوبے میں کورونا سے اموات کی روزانہ تعداد 30 سے زیادہ نہیں بڑھی۔
محکمہ صحت کے پی سے جاری رپورٹ میں کہا گیا ہے کہ صوبے میں کورونا کیسز کی مجموعی تعداد 90 ہزار 262 ہوگئی ہے، جبکہ 24 گھنٹوں کے دوران کورونا کے 484 مریض صحت یاب ہوئے، جس کے بعد صحت یاب افراد کی تعداد 77 ہزار 650 ہوگئی ہے۔
محکمہ صحت کے مطابق پشاور میں 24 گھنٹوں کے دوران کورونا کے 244 نئے کیسز رپورٹ ہوئے، جس کے بعد شہر میں کیسز کی مجموعی تعداد 36 ہزار 959 ہوگئی ہے، جبکہ پشاور میں وائرس سے اب تک 1294 افراد جاں بحق ہو چکے ہیں۔
رپورٹ میں کہا گیا ہے کہ صوبے میں ایک دن میں 8 ہزار 239 نئے ٹیسٹ کئے گئے، اور ابتک کل 13 لاکھ 72 ہزار 319 ٹسٹ کیے جا چکے ہیں۔