نیوزی لینڈ نے پاکستان کو دوسرا ون ڈے بھی ہرا دیا

(ویب ڈیسک)نیوزی لینڈ نے پاکستان کو دوسرا ون ڈے میچ بھی ہرا کر 3 میچز کی سیریز میں فیصلہ کُن برتری حاصل کرلی،سیریز کا آخری میچ 5 اپریل کو کھیلا جائے گا۔

ہیملٹن میں کھیلے گئے میچ میں پاکستان نے ٹاس جیت کر پہلے بولنگ کا فیصلہ کیا جس کے بعد نیوزی لینڈ نے پاکستان کو جیت کے لیے 293 رنز کا ہدف دیا تھا،نیوزی لینڈ نے مچل ہی کے 99 رنز کی بدولت مقررہ 50 اوورز میں 8 وکٹوں کے نقصان پر 292 رنز بنائےتھے۔

پاکستانی ٹیم نے ہدف کے تعاقب کا آغاز مایوس کن انداز میں کیا، کیوی فاسٹ بولرز کے سامنے اوپنرز سمیت مڈل آرڈر بھی ناکام ثابت ہوااورآدھی ٹیم صرف 11.4 اوورز میں ہی واپس پویلین لوٹ گئی، ابتدائی 5 بیٹرز ڈبل فیگر میں بھی داخل نہ ہوسکے،عبداللّٰہ شفیق 1، امام الحق 3، بابر اعظم 1، کپتان محمد رضوان 5 اور سلمان آغا 9 رنز بنا کر آؤٹ ہوئے۔

آدھی ٹیم آؤٹ ہونے کے بعد ایک اینڈ سے وکٹس گرتی رہیں تاہم دوسرے اینڈ سے فہیم اشرف نے مزاحمت جاری رکھی اور انہوں نے اس دوران اپنی نصف سنچری مکمل کی، 37.4 اوورز میں پاکستان کی نویں وکٹ 174 رنز پر گر گئی۔

محمد وسیم 1، طیب طاہر 13 اور عاکف جاوید 8 رنز بنا کر آؤٹ ہوئے،بعدازاں میچ کے دوران حارث رؤف ہیلمٹ پر باؤنسر لگنے کے بعد گراؤنڈ سے باہر چلے گئے جس کے بعد کنکشن قانون کے تحت حارث رؤف کی جگہ نسیم شاہ بیٹنگ کے لیے آئے اور نسیم شاہ نے اچھی بیٹنگ کی اور اپنی نصف سنچری مکمل کی، وہ 51 رنز بنا کر آؤٹ ہوئے جبکہ سفیان مقیم 13 رنز پر ناٹ آؤٹ رہے۔

دوسرے ون ڈے میچ میں پاکستانی ٹیم میں 4 تبدیلیاں کی گئی تھیں، عثمان خان، محمد علی، عرفان نیازی اور نسیم شاہ کو پلیئنگ الیون میں شامل نہیں کیا گیا جبکہ امام الحق، فہیم اشرف، وسیم جونیئر اور سفیان مقیم کو ٹیم میں شامل کیا گیا تھا۔

واضح رہے کہ ہفتے کے روز کھیلے گئے ون ڈے سیریز کے پہلے میچ میں نیوزی لینڈ نے پاکستان کو 73 رنز سے شکست دی تھی۔

قبل ازیں کیوی ٹیم نے پہلے بیٹنگ کرتے ہوئے مقررہ 50 اوورز میں 8 وکٹوں کے نقصان پر 292 رنز بنائے۔ اوپنرز نے ٹیم کو اچھا آغاز فراہم کیا اور 6.2 اوورز میں 54 رنز کی شراکت قائم کی لیکن نک کیلی 31 رنز بنا کر پویلین واپس لوٹ گئے،رہیس ماریو 18، ہینری نکولس 22، ڈیرل مچل 18، مائیکل بریسویل 17 رنز بنا سکے۔

محمد عباس نے اپنے کیرئیر کی دوسری اننگز میں بھی بہترین کارکردگی کا مظاہرہ کیا، 132 رنز پر کیویز کے 5 کھلاڑی آؤٹ ہونے پر محمد عباس نے ذمہ دارانہ بیٹنگ کی اور 41 رنز بنائے۔

کیویز کی جانب سے مچل سب سے نمایاں بیٹسمین رہے جنہوں نے 78 گیندوں پر 7 چوکے اور 7 چھکوں کی مدد سے ناقابل شکست 99 رنز بنائے۔

یہ بھی پڑھیں:عید کی چھٹیوں پر مری کا رخ کرنے والے سیاحوں کیلئے اہم خبر

پاکستان کی جانب سے سفیان مقیم اور محمد وسیم نے 2،2 کیوی کھلاڑیوں کو شکار کیا جبکہ حارث رؤف، فہیم اشرف اور عاکف جاوید کے حصے میں ایک ایک وکٹ آئی۔

پاکستان نے نیوزی لینڈ کے خلاف ون ڈے سیریز کے دوسرے میچ میں ٹاس جیت کر پہلے فیلڈنگ کا فیصلہ کیاتھا۔

واضح رہے کہ تین ون ڈے میچوں کی سیریز میں نیوزی لینڈ کو ایک صفر کی برتری حاصل ہے۔

اس ون ڈے کے لیے پاکستانی سکواڈ عبداللہ شفیق، امام الحق، بابر اعظم، محمد رضوان (کپتان)، سلمان آغا، طیب طاہر، فہیم اشرف، محمد وسیم، حارث رؤف، سفیان مقیم اور عاکف جاویدپرمشتمل ہے۔

نیوزی لینڈ کی ٹیم رہیس ماریو، نک کیلی، ہینری نکولس، ڈیرل مچل، مائیکل بریسویل (کپتان)، محمد عباس، مچل ہے، نیتھن اسمتھ، جیکب ڈفی، بین سیئرز، ول اورورکی پر مشتمل ہے۔