(ویب ڈیسک)پاکستانی سُپراسٹار اداکار فواد خان نے آنے والی بالی ووڈ فلم کا ٹیزر شیئر کر دیا،وہ 9 سال بعد 9 مئی کو بھارتی سنیما انڈسٹری میں دوبارہ انٹری دینے کے لیے تیار ہیں۔
گزشتہ روز فواد خان اور بھارتی اداکارہ وانی کپور کی آنے والی فلم "عبیر گلال" کا پہلا ٹیزر جاری ہوگیا،لندن میں فلمائی گئی اس رومانوی کامیڈی فلم میں فواد خان عبیر سنگھ کا مرکزی کردار بنھا رہے ہیں جبکہ ان کے مدمقابل وانی کپور جلوہ گر ہیں۔
01 منٹ 02 سیکنڈ کے ٹیزر میں فواد خان رومانوی انداز میں 1994 میں ریلیز ہونے والی کلاسک بالی ووڈ فلم"’1942 اے لو اسٹوری" کا مشہور زمانہ گانا "کچھ نہ کہو" گنگناتے ہوئے نظر آرہے ہیں۔
آرتی ایس بگدی کی ہدایت کاری میں بننے والی اس فلم کی کہانی ایک ایسی محبت کے گرد گھومتی ہے جو لندن میں پروان چڑھی ہے، غیر متوقع اُتار چڑھاؤ کے ساتھ فلم کی کہانی میں دل کو چھو لینے والے لمحات اور فواد خان اور وانی کپور کی کیمسٹری کو خوبصورت انداز سے پیش کیا گیا ہے۔
2018 کے بعد کسی پاکستانی فنکار کی ہندی سنیما میں یہ پہلی فلم ہے، اس سے قبل اداکار عمران عباس گزشتہ برس پنجابی فلم میں دکھائی دے چکے ہیں۔
یہ بھی پڑھیں:مفتی قوی کا عید پر راکھی ساونت کو محبت بھرا پیغام
واضح رہے کہ 2016 میں پاکستانی فنکاروں پر پابندی کا اعلان کیا گیا تھا، اس پابندی کو باضابطہ قانونی شکل دینے کے لیے بھارتی انتہا پسند جماعت شیو سنا کی جانب سے 2023 میں عدالت میں اپیل دائر کی گئی تھی جو بھارتی عدالت نے مسترد کر دی تھی۔
فواد خان آخری بار 2016 میں ریلیز ہونے والی بالی ووڈ فلم "اے دل ہے مشکل" میں دکھائی دیے تھے۔