(ویب ڈیسک)امریکی جریدے"فوربز" نے 2025 کے لیے دنیا کے امیر ترین افراد کی فہرست جاری کر دی جس کے مطابق ایلون مسک ایک بار پھر دنیا کے امیر ترین فرد قرار پائے ہیں۔
ایلون مسک کی دولت میں 2024 کے دوران 75 فیصد اضافہ ہوا اور اس طرح وہ ایک بار پھر فوربز کی فہرست میں دنیا کے امیر ترین شخص بن گئے۔
اس سے قبل 2024 میں فرانس سے تعلق رکھنے والے برنارڈ آرنلٹ دنیا کے امیر ترین شخص قرار دیے گئے تھے۔
نئی فہرست میں ایلون مسک نے 342 ارب ڈالرز کے ساتھ دنیا کے امیر ترین شخص ہونے کا اعزاز حاصل کیا،یہ پہلی بار ہے جب کوئی فرد اتنی زیادہ دولت کے ساتھ دنیا کا امیر ترین شخص قرار پایا ہے۔
فوربز کی 39 ویں سالانہ فہرست کے مطابق دنیا بھر میں اس وقت 3028 ارب پتی موجود ہیں جو تاریخ میں سب سے زیادہ تعداد ہے،ایک سال کے دوران 247 افراد ارب پتی بنے۔
رپورٹ میں بتایا گیا کہ دنیا کے ارب پتی افراد کی دولت میں ایک سال کے دوران 2 ہزار ارب ڈالر کا اضافہ ہوا اور وہ مجموعی طور پر 16 ہزار ارب ڈالر سے زیادہ کے مالک ہیں۔
فہرست میں میٹا کے چیف ایگزیکٹو مارک زکربرگ 2016 ارب ڈالر کے ساتھ دنیا کے دوسرے جبکہ ایمازون کے بانی جیف بیزوس 2015 ارب ڈالر کے ساتھ تیسرے امیر ترین شخص قرار پائے ہیں۔
اوریکل کے شریک بانی لیری ایلیسن 192 ارب ڈالر، برنارڈ آرنلٹ 178 ارب ڈالر، وارن بفٹ 154 ارب ڈالر کے ساتھ چھٹے، گوگل کے شریک بانی لیری پیج 144 ارب کے ساتھ 7 ویں جبکہ دوسرے شریک بانی سرگئی برن 138 ارب ڈالر کے ساتھ 8 ویں نمبر پر رہے ہیں۔
سپین سے تعلق رکھنے والے ایمانسیو اورٹیگا کے حصے میں 9 واں نمبر آیا جو 124 ارب ڈالر کے مالک ہیں،مائیکرو سافٹ کے سابق چیف ایگزیکٹو اسٹیو بالمر 118 ارب ڈالر کے ساتھ 10 ویں نمبر پر رہے ہیں۔
یہ بھی پڑھیں:امریکا کی 23 ریاستوں کا ٹرمپ انتظامیہ کے خلاف مقدمہ
برسوں تک دنیا کے امیر ترین شخص رہنے والے مائیکرو سافٹ کے شریک بانی بل گیٹس اب کافی نیچے آگئے ہیں اور 108 ارب کے ساتھ 13 ویں نمبر پرہیں،بھارت کے مکیش امبانی 92.5 ارب ڈالر کے ساتھ ایشیا کے امیر ترین شخص قرار پائے ہیں جبکہ مجموعی طور پر وہ دنیا کے 18 ویں امیر ترین شخص ہیں۔
دنیا کی امیر ترین خاتون امریکا سے تعلق رکھنے والی ایلس والٹن ہیں جو 101 ارب ڈالر کے ساتھ 15 ویں نمبر پر ہیں،ان کے بعد فرانس کی Francoise Bettencourt Meyers دنیا کی دوسری امیر ترین خاتون قرار دی گئی ہیں جو 81.6 ارب ڈالر کی مالک ہیں۔