(24 نیوز) تحریک انصاف کے بانی اور سابق وزیراعظم سے صوبہ خیبرپختونخوا کے وزیراعلیٰ علی امین گنڈاپور اور ان کے مشیر برائے اطلاعات بیرسٹرسیف نے اڈیالہ جیل میں طویل ملاقات کی۔
تفصیلات کے مطابق بانی پی ٹی آئی سے وزیراعلیٰ کے پی کے علی امین گنڈاپور اور مشیر برائے اطلاعات بیرسٹرسیف کی ملاقات ڈھائی گھنٹے جاری رہی جس میں سیاسی صورتحال، پارٹی اور دیگر امور پر گفتگو ہوئی۔
ملاقات کا محوراسٹیبلشمنٹ سے مذاکرات تھا اور علی امین، بیرسٹرسیف بانی پی ٹی آئی کو قائل کرنے میں کامیاب ہوئے، بانی پی ٹی آئی نے علی امین گنڈاپور کی پیشکش پر نیم رضامندی ظاہر کی۔
ذرائع کے مطابق بانی پی ٹی آئی نے علی امین اور بیرسٹرسیف کواسٹیبلشمنٹ سے مذاکرات کا ٹاسک دے دیا اور اسٹیبلشمنٹ سے مذاکرات میں کسی پیشرفت تک اسے خفیہ رکھنے پر اتفاق ہوا،ذرائع کا کہنا ہے کہ آئندہ چند روز میں علی امین گنڈاپور بانی پی ٹی آئی سے ایک اور ملاقات کریں گے۔
گنڈاپور نے اسٹیبلشمنٹ کے ساتھ مزاکرات کے حوالے سے بانی پی ٹی آئی کو اپنے نکتہ نظر پر قائل کیا،گنڈاپور نےبانی سے مکالمے میں کہا کہ میرے مشورہ پر چلیں، میں آپ کو جیل سے باہر نکالنے کے وعدہ پر قائم ہوں۔
واضح رہے کہ علی امین گنڈا پور کی ڈیڑھ ماہ سے زائد عرصے کے بعد بانی پی ٹی آئی سے ملاقات ہوئی ہے۔ گزشتہ روز بھی تحریک انصاف کے رہنماؤں نے پارٹی کے بانی سے جیل میں ملاقات کی تھی۔
یہ بھی پڑھیں: خالہ زاد بہن کی محبت میں گرفتار نوجوان کی خودکشی،لڑکی نے کیا پنگا لیا؟