کراچی: نامعلوم افراد کی فائرنگ، لڑکا اور لڑکی جاں بحق

(24نیوز) شہر قائد میں نامعلوم افراد کی فائرنگ سے نوجوان لڑکا اور لڑکی جاں بحق ہو گئے ہیں۔ فائرنگ کا واقعہ شہر کے پوش علاقے بوٹ بیسن میں پیش آیا ہے۔
ابتدائی طور پر معلوم ہوا ہے کہ فائرنگ بوٹ بیسن کے قریب ایک گلی میں کی گئی جہاں سے پولیس کو پستول کے چھ خول ملے ہیں۔علاقہ پولیس کے مطابق  گولی لگنے سے جاں بحق ہونے والے لڑکے کی شناخت عدنان کے نام سے ہوئی ہے۔ مقتول گمبٹ کا رہائشی تھا اور ہجرت کالونی کراچی میں قیام پذیر تھا۔ گولی لگنے سے جاں بحق ہونے والی لڑکی کی تاحال شناخت نہیں ہو سکی ہے۔
ابتدائی اطلاعات کے مطابق گولی لگنے سے جاں بحق ہونے والے لڑکا اور لڑکی موٹرسائیکل پرسوار تھے جبکہ فائرنگ کرنے والے افراد گاڑی میں سوار تھے۔فائرنگ کی اطلاع ملتے ہی علاقہ پولیس اور امدادی اداروں کے رضا کار جائے حادثہ پر پہنچ گئے تھے۔ امدادی اداروں کے رضاکاروں نے جاں بحق ہونے والے افراد کی نعشیں جناح ہسپتال منتقل کردی ہیں۔بتایا گیا ہے کہ مقتولین کو تین تین گولیاں سر اور سینے پر لگی ہیں۔ مقتولین کی عمریں 25 اور 26 سال بتائی جا رہی ہیں۔