(24نیوز) کراچی کے علاقے منگھو پیر سے 12 روز قبل اغواء ہونے والے نوجوان کو گڑھی یاسین سے بازیاب کر لیا گیا، پولیس نے ایک اغواء کار کو گرفتار کر لیا ہے، جبکہ اس کے ساتھیوں کی تلاش جاری ہے۔
تفصیلات کے مطابق منگھو پیر انویسٹی گیشن پولیس نے منگھو پیر سے اغواء کیے جانے والے نوجوان کو گڑھی یاسین سےبازیاب کراتے ہوئے ایک اغواء کار کوگرفتار کرلیا۔اس حوالے سے منگھو پیرانویسٹی گیشن پولیس نے بتایا کہ مغوی 16 سالہ امام دین کو 12 روز قبل منگھو پیر سے اغواء کیا گیا تھا۔مغوی کو اندورنِ سندھ گڑھی یاسین میں زنجیروں سے باندھ کر رکھا ہوا تھا۔
ذرائع کے مطابق پولیس نے خفیہ اطلاع ملنے پر چھاپہ مار کرکارروائی کرتے ہوئے مغوی امام دین کو باحفاظت بازیاب کرلیا اور ایک اغواء کار سکندر کو گرفتار کر لیا ہے۔ پولیس کے مطابق اغواء میں 8 سے 10 افراد ملوث ہیں، مغوی کو جائیداد کے تنازع پر اغواء کیا گیا تھا، مغوی اور ملزم کو کراچی منتقل کر دیا گیا ہے، گرفتار اغواء کار سے مزید تفتیش کی جا رہی ہے۔