(ویب ڈیسک) بھارت کے ایک اور پنجابی گلوکار و اداکار کو جان سے مارنے کی دھمکی دی گئی ہے۔
تفصیلات کے مطابق بھارت کے عالمی شہرت یافتہ ریپ اسٹار سدھو موسے والا کے قتل کے بعد ایک اور بھارتی گلوکار و اداکار منکرت اولکھ کو بھی جان سے مارنے کی دھمکی دے دی گئی۔
31 سالہ منکرت اولکھ نے جان کے تحفظ کے لیے سیکیورٹی میں مزید اضافہ کرنے کا مطالبہ کر دیا ہے، انھوں نے کہا مجھے جان سے مارنے کی دھمکی دی گئی ہے، سیکیورٹی میں اضافہ کیا جائے۔
یہ بھی پڑھیں:سدھو موسے والا کے قاتلوں کا پتہ چل گیا
یاد رہے کہ منکرت اولکھ کو اپریل میں دیویندر بمبیہا گینگ کی جانب سے دھمکیاں موصول ہوئی تھیں جس کے بعد گلوکار و اداکار نے اپنی سیکیورٹی میں اضافہ کرنے کا مطالبہ کیا تھا۔
واضح رہے کہ ان دنوں بھارت میں گلوکاروں کی اچانک اموات کی خبروں نے میڈیا کو ہلا کر رکھا ہوا ہے، زبردست شہرت رکھنے والے نوجوان گلوکار سدھو موسے والا کو سر راہ کئی گولیاں مار کر قتل کیا گیا، اور چند دن قبل بھارت کے ایک نہایت شان دار گلوکار کے کے کو کنسرٹ کے بعد اچانک موت نے آ لیا۔
ادھر بھارتی میڈیا رپورٹس کے مطابق سدھو موسے والا کو قتل کرنے کی ذمہ داری گینگسٹر گولڈی برار نے قبول کی ہے، ریپ اسٹار کے بہیمانہ قتل کی ذمہ داری قبول کرنے کی وجہ سے کینیڈا میں مقیم گینگسٹر گولڈی برار اس وقت توجہ کا مرکز بن گیا ہے، گولڈی راجستھان کی جیل میں قید گینگ لیڈر لارنس بشنوئی کا قریبی ساتھی ہے۔