ودیا بالن ڈیپ فیک سے بنائی گئی اپنی جعلی ویڈیوز پرپھٹ پڑیں

(ویب ڈیسک)معروف بالی ووڈ اداکارہ ودیا بالن سوشل میڈیا پر وائرل ہونیوالی اے آئی سے تیار کردہ اپنی جعلی ویڈیوز پرسیخ پاہوگئیں۔ 

اداکارہ نے انسٹاگرام پر ایک بیان جاری کرتے ہوئے واضح کیا کہ ان ویڈیوز کا ان سے کوئی تعلق نہیں اور وہ ان کے خیالات یا کام کی نمائندگی نہیں کرتیں۔

ودیا بالن نے اپنے بیان میں مزیدکہاکہ سوشل میڈیا اور واٹس ایپ پر کئی ویڈیوز گردش کر رہی ہیں، جو بظاہر مجھ سے منسلک لگتی ہیں ،لیکن میں واضح کرنا چاہتی ہوں کہ یہ ویڈیوز اے آئی سے بنائی گئی ہیں اور حقیقت پر مبنی نہیں ہیں،میرا ان ویڈیوز کے بنانے یا پھیلانے میں کوئی ہاتھ نہیں ہے اور نہ ہی میں ان کے مواد کی حمایت کرتی ہوں۔ جو بھی ان ویڈیوز میں کہا گیا ہے، وہ میرے خیالات کی عکاسی نہیں کرتا، میں سب سے درخواست کرتی ہوں کہ کسی بھی مواد کو شیئر کرنے سے پہلے اس کی تصدیق کریں اور گمراہ کن AI مواد سے محتاط رہیں۔

اس سے قبل رشمیکا مندنا، عالیہ بھٹ، دپیکا پڈوکون، کترینہ کیف، عامر خان، رنویر سنگھ اور سچن ڈندولکر جیسے سٹارز بھی جعلی AI ویڈیوز کے ذریعے نشانہ بنائے جاچکے ہیں۔

یہ بھی پڑھیں:عمر شہزاد نے مدینے میں نکاح کی ویڈیو شیئر کردی

ودیا بالن کو حال ہی میں رومانوی کامیڈی فلم"دو اور دو پیار" میں دیکھا گیا تھا، جس کی کاسٹ میں پرتیک گاندھی، الیانا ڈی کروز اور سندھیل راما مورتی بھی شامل تھے،ودیابالن نے اس کے علاوہ،"بھول بھلیاں 3" میں بھی کام کیا، جس میں کارتیک آریان، مادھوری ڈکشٹ اور تریپتی ڈمری بھی شامل تھے۔