(24 نیوز)بھارتی بلے باز ویرات کوہلی نے ون ڈے کیرئیر میں 300 میچز کھیل کر نیا ریکارڈ قائم کر دیا ہے۔
اپنے مداحوں میں ’کنگ کوہلی‘ کہلانے والے ویرات کوہلی طویل عرصے سے آؤٹ آف فارم رہے ہیں تاہم ان کے متعلق یہ قیاس آرائیاں عروج پر تھیں کہ ان کے اور انڈین ٹیم کے کپتان روہت شرما کے جلد ہی کرکٹ سے ریٹائرمنٹ لینے کے امکانات ہیں۔
یاد رہے کہ یہ دونوں کھلاڑی پہلے ہی ٹی20 انٹرنیشنل سے کنارہ کشی اختیار کر چکے ہیں۔
واضح رہے کہ ورات کوہلی نے سب سے زیادہ کیچز تھامنے کا ملکی ریکارڈ اپنے نام کیا ہے، 36 بھارتی کرکٹر نے اپنے 299 ویں ون ڈے میچ میں 158 کیچز مکمل کرتے ہوئے محمد اظہر الدین کو پیچھے چھوڑ دیا۔
یہ سنگ میل دبئی میں کھیلے گئے میچ کے 47 ویں اوور میں عبور ہوا جب پاکستان کے نسیم شاہ نے کلدیپ یادیو کی گیند پر اونچا شاٹ کھیلا اور لانگ آن پر کھڑے کوہلی نے ایک شاندار کیچ پکڑ کر ریکارڈ اپنے نام کر لیا۔
سری لنکا کے مہیلا جے وردھنے 443 اننگز میں 218 کیچز کے ساتھ سب سے زیادہ کیچ پکڑنے والے فیلڈرز کی فہرست میں پہلے نمبر پر ہیں۔ آسٹریلیا کے رکی پونٹنگ 372 اننگز میں 160 کیچز کے ساتھ دوسرے جبکہ بھارت کے ویرات کوہلی 296 اننگز میں 158 کیچز کے ساتھ تیسرے نمبر پر موجود ہیں۔
یہ بات قابل ذکر ہے کہ یہ کھلاڑی نہ صرف اپنی بیٹنگ کے لیے جانے جاتے ہیں بلکہ اپنی فیلڈنگ کی مہارت سے بھی ٹیم کی کامیابی میں اہم کردار ادا کرتے رہے ہیں۔
گزشتہ روز چیمپیئنز ٹرافی کے میچ میں بھارت نے پاکستان کو 6 وکٹوں سے شکست دی تھی۔ ایونٹ میں مسلسل دوسری فتح سے بھارتی ٹیم کے سیمی فائنل میں پہنچنے کے امکانات روشن ہوگئے ہیں۔