انٹراپارٹی الیکشن کیس، پی ٹی آئی کو دستاویزات جمع کروانے کیلئے مزید مہلت

(24نیوز)الیکشن کمیشن نے انٹراپارٹی الیکشن کیس میں پی ٹی آئی کو دستاویزات جمع کروانے کیلئے مزید مہلت دیدی۔

الیکشن کمیشن کے رکن نثار درانی کی سربراہی میں چار رکنی بینچ نے تحریک انصاف انٹراپارٹی الیکشن کیس پر سماعت کی۔ تحریک انصاف کے چیئرمین بیرسٹرگوہر الیکشن کمیشن میں پیش ہوئے۔

پی ٹی آئی چیئرمین بیرسٹر گوہر نے موقف اختیار کیا کہ ہم نے انٹرا پارٹی الیکشن ریکارڈ ایف آئی اے سے حاصل کرنے کیلئے عدالت سے رجوع کیا ہے، کورٹ نے ایف آئی اے سے ہمارا ریکارڈ مانگ لیا ہے، ہم نے ایف آئی اے کو کہا ہے کہ ہمیں ریکارڈ دیں ہم کاپی کرکے انہیں واپس کر دیں گے۔

پی ٹی آئی چیئرمین نے کہا کہ ہفتے دس دن میں ایف آئی اے سے ہمیں ریکارڈ مل جائے گا، اس لئے دستاویزات جمع کروانے کے لیے مزید مہلت دی جائے،الیکشن کمیشن نے تحریک انصاف کو دستاویزات جمع کرانے کے لئے مزید مہلت دے دی اور انٹرا پارٹی الیکشن کیس کی سماعت 22 اکتوبر تک ملتوی کردی۔