عماد وسیم  آسٹریلوی بگ بیش لیگ کھیلیں گے

(24 نیوز)پاکستان کرکٹ ٹیم کے معروف آل راؤنڈر عماد وسیم  آسٹریلوی بگ بیش لیگ کھیلیں گے، انہوں نے میلبورن رینی گڈز کیساتھ معاہدہ  کرلیا ہے۔

 تفصیلات کے مطابق عماد وسیم  پاکستان کی جانب سےنیوزی لینڈ میں3 ٹی20 میچز کھیلنے کے بعد بگ بیش لیگ کیلئے آسٹریلیا روانہ ہوں گے۔ یاد رہے کہ پاکستان کرکٹ ٹیم کے سپن بالر اور لیفٹ ہینٖڈ بلے بازعماد وسیم اس وقت قومی ٹیم کے ہمراہ نیوزی لینڈ کے دورہ پر  ہیں۔

آل راؤنڈر عماد وسیم  آسٹریلیا پہنچنے کے بعد قرنطینہ کے بغیر ہی میچز کھیل سکیں گے۔ میلبورن رینی گڈزکے کوچ نے کہا ہے کہ عماد وسیم دنیا کے بہترین کھلاڑیوں میں سے ہیں جو اچھے بالر اور بلے باز ہیں۔انہوں نے کہا عماد وسیم سے ہمارا مڈل آرڈر مضبوط  ہوگا اور وہ پاور پلے میں اچھی بالنگ بھی کر سکتے ہیں۔

پی سی بی نے آل راونڈر عماد وسیم کو بگ بیش لیگ میں حصہ لینے کے لیے این او سی پہلے ہی جاری کر دیا ہے۔ عماد وسیم  انگلش کاونٹی ناٹنگھم شائر کی جانب سے انگلش بلاسٹ میں بھی شرکت کر چکے ہیں۔آسٹریلیا میں کھیلے جانیوالی بگ بیش لیگ کا فائنل 6 فروری کو کھیلا جائے گا۔