(ویب ڈیسک) پاکستان سپر لیگ سیزن 9 کا آفیشل ترانہ معروف گلوکار و میوزک کمپوزر علی ظفر گائیں گے، جس کی انہوں نے تیاری شروع کردی ہے۔
پی ایس ایل کے اکاؤنٹ پر جاری ایک پیغام میں تصدیق کی گئی ہے کہ رواں سیزن 9 کا گانے میں علی ظفر اپنی آواز کا جادو جگائیں گے۔
سوشل میڈیا پیغام میں ’سیٹی تو بجے گی‘ ایک لائن شیئر کی گئی جس سے یہ اندازہ لگایا جارہا ہے کہ شاید یہ پی ایس ایل 9 کے ترانے کا ٹائٹل ہوگا۔
اُدھر جواب میں گلوکار علی ظفر نے بھی سوشل میڈیا پر یہ پیغام شیئر کرتے ہوئے لکھا ہے کہ بالکل بجے گی اور سٹیج بھی پھر سے سجے گا۔
انہوں نے گانے کی تیاری کے حوالے سے اپنی ایک ویڈیو شیئر کی جس میں وہ پیانو پر دھن کی تیاری میں مصروف ہیں۔
واضح رہے کہ علی ظفر نے پاکستان سپر لیگ کے ابتدائی تین سیزن کے ترانے گائے جس کی مقبولیت آج تک ہے۔
پاکستان سُپر لیگ کے نویں ایڈیشن کے میچز 17 فروری سے چار شہروں کراچی، لاہور، ملتان اور راولپنڈی میں کھیلے جائیں گے۔
ایونٹ کا فائنل 18 مارچ کو کراچی کے نیشنل بینک اسٹیڈیم میں کھیلا جائے گا۔