(ویب ڈیسک) پاکستان پیپلز پارٹی کی رہنما، رکنِ قومی اسمبلی، خاتونِ اوّل آصفہ بھٹو کی آج سالگرہ ہے۔
سابق وزیرِ اعظم محترمہ بینظیر بھٹو اور صدرِ مملکت آصف علی زرداری کی سب سے چھوٹی صاحبزادی آصفہ بھٹو آج اپنی 32 ویں سالگرہ منا رہی ہیں ، آصفہ بھٹو کو پی پی پی کے تصدیق شدہ انسٹاگرام اور فیس بُک پیج پر بھی سالگرہ کی مبارکباد دی گئی ہے۔
دوسری جانب آصفہ بھٹو کی بڑی بہن بختاور بھٹو کی جانب سے بھی انہیں دلچسپ انداز میں مبارک باد دی گئی ہے۔
بختاور بھٹو نے ایک کیک کی تصویر شیئر کروائی ہے جس پر ان کی اور آصفہ کی تصویر دیکھی جا سکتی ہے۔
اس پوسٹ کے کیپشن میں بختاور بھٹو نے آصفہ کو ٹیگ کرتے ہوئے لکھا ہے کہ" آصفہ بھٹو زرداری کو سالگرہ بہت مبارک ہو! ہمیں آپ کی تمام کامیابیوں پر بے حد فخر ہے اور جو کچھ آپ مسلسل حاصل کر رہی ہیں اس پر بھی۔"
انہوں نے لکھا ہے کہ "ہمیں ان تمام چیزوں پر فخر ہے جو آپ نے ناصرف بطور ایک منتخب رکنِ قومی اسمبلی اور بطور پاکستان کی خاتونِ اوّل حاصل کی ہیں۔"
انہوں نے لکھا ہے کہ" آپ کے میرے تین بچوں کی سب سے پیاری آنٹی ہونے پر بھی ہمیں فخر ہے۔"
بختاور بھٹو نے چھوٹی بہن آصفہ بھٹو کو مخاطب کرتے ہوئے یہ بھی لکھا ہے کہ آپ کی لگن، مہربانی اور اٹل عزم سے ہم سب متاثر ہیں، ہمیں آپ پر بے حد ناز ہے۔