پہلے وزیرِ اعلیٰ سندھ اللّٰہ بخش سومرو کی صاحبزادی رضیہ سومرو انتقال کر گئیں

(ویب ڈیسک) صوبہ سندھ کے پہلے وزیرِ اعلیٰ شہید اللّٰہ بخش سومرو کی صاحبزادی رضیہ سومرو انتقال کر گئیں۔

 اہلِ خانہ کے مطابق رضیہ سومرو نے 100سال کی عمر پائی ، اہلِ خانہ نے بتایا ہے کہ مرحومہ رضیہ سومرو کی نمازِ جنازہ کل 3 بجے جیکب آباد میں ادا کی جائے گی۔

یاد رہے کہ پاکستان کے وجود میں آنے سے قبل اللّٰہ بخش سومرو سندھ کے دو بار وزیرِ اعلیٰ بنے۔

سندھ کے سب سے کم عمر وزیرِ اعلیٰ اللّٰہ بخش سومرو کو 1943ء میں شکار پور میں ایک نامعلوم شخص نے گولی مار کر شہید کر دیا تھا، اس وقت ان کی عمر 42 برس تھی۔ 

اللّٰہ بخش سومرو کے قتل کے بعد ان کے فرزند رحیم بخش سومرو نے سیاست کی دنیا میں قدم رکھا تھا، اسی خاندان کے فرد الہٰی بخش سومرو قومی اسمبلی کے اسپیکر رہ چکے ہیں۔

یہ بھی پڑھیں : 9 مئی مقدمات: پی ٹی آئی رہنما زرتاج گل اور خیال احمد کاسترو پر فرد جرم عائد

 اس خاندان کے ایک اور فرد اور الہٰی بخش سومرو کے بھتیجے محمد میاں سومرو چیئرمین سینیٹ، نگراں وزیرِ اعظم کے علاوہ وفاقی وزیر بھی رہے ہیں ، اللّٰہ بخش سومرو کے نواسے حفیظ شیخ پاکستان کے وزیرِ خزانہ رہے ہیں۔