مریم نواز نے فری سولر پینل  سکیم کا آغاز کردیا 

(24  نیوز )  پنجاب کی وزیراعلیٰ مریم نواز نے رمضان میں عوام کو ریلیف دینے کیلئے مفت سولر پینل  سکیم کی ڈیجیٹل قرعہ اندازی کردی۔

وزیراعلیٰ مریم نواز نے فری سولر پینل اسکیم کی خود کار ڈیجیٹل قرعہ اندازی کردی، مریم نواز نے فری سولر پینل اسکیم میں کامیابی حاصل کرنے والے صارفین کو مبارکباد دیتے ہوئے انتظامیہ کو ہدایت کی کہ سولر پینل انسٹالیشن پراسیس جلد از جلد مکمل کیا جائے، مریم نواز نے اس موقع پر کہا کہ عوام کو مہنگی بجلی سے ریلیف دینا چاہتے ہیں، ہرگز تاخیر نہ کی جائے، فری سولر پینل اسکیم کو جلد از جلد پایہ تکمیل تک پہنچایا جائے۔

 سیکرٹری انرجی نے چیف منسٹر پنجاب کو فری سولر پینل اسکیم کے بارے میں بریفنگ دیتے ہوئے بتایا کہ فری سولر پینل اسکیم کے تحت سال بھر میں 94 ہزار 483  سولر سسٹم لگائے جائیں گے، ماہانہ 200 یونٹ تک بجلی استعمال کرنیوالے صارفین کیلئے سولر سسٹم مفت انسٹال کیا جائے گا، فری سولر پینل اسکیم کیلئے 8 لاکھ 61 ہزار صارفین نے اپلائی کیا۔

 یہ بھی پڑھیں:1 لاکھ 10 ہزار طلباء میں جدید لیپ ٹاپ تقسیم کرینگے: وزیرِ تعلیم پنجاب 

انہوں نے کہا کہ فری سولر پینل اسکیم کا تمام پراسیس اینڈ ٹو اینڈ ڈیجیٹلائزیشن کے ذریعے مکمل کیا گیا، 0.55 کلوواٹ کے 47 ہزار 182 اور 1.1 کلوواٹ کے 47 ہزار 301 سولر سسٹم انسٹال کئے جائیں گے، 100 یونٹ ماہانہ اور 200 یونٹ تک ماہانہ بجلی استعمال کرنیوالے صارفین کو سولر سسٹم مفت دیا جائے گا، صارفین کے ماہانہ بل پر درج ریفرنس نمبر اور سی این آئی سی نمبر سے ویری فکیشن کی جائے گی۔

  سیکرٹری انرجی نے بریفنگ میں بتایا کہ فری سولر پینل حاصل کرنے والے صارفین کی معاونت اور رہنمائی کیلئے ہیلپ لائن بھی قائم کی گئی ہے، سولر پینل اور انورٹر کو چوری سے بچانے کیلئے صارف کے شناختی کارڈ سے منسلک کیا جائے گا، پنجاب میں ایک لاکھ سولر سسٹم انسٹال کرنے سے 57 ہزار ٹن کاربن کا اخراج کم ہوگا، فری سولر پینل اسکیم سے وفاقی حکومت پر بھی سبسڈی کا بوجھ کم ہوگا۔

ذرائع کے مطابق فزیکل ویری فکیشن کے بعد مارچ کے آخر میں صوبہ بھر میں مفت سولر سسٹم کی انسٹالیشن شروع ہوگی، جولائی کے آخر تک فری سولر پینل اسکیم کا پہلا مرحلہ مکمّل ہو جائے گا۔