ایرانی ایٹمی تنصیبات پر حملے کی حمایت نہیں کرتے، امریکی صدر جوبائیڈن

(ویب ڈیسک) امریکی صدر جوبائیڈن نے کہا کہ وہ ایرانی ایٹمی تنصیبات پر حملے کی حمایت نہیں کرتے۔

امریکی صدر جو بائیڈن نے صحافیوں سے گفتگو کرتے ہوئے یہ بھی کہا کہ ایران پر مزید پابندیاں عائد کی جائیں گی، وہ جلد ہی اس حوالے سے اسرائیلی وزیر اعظم بنیامین نیتن یاہو سے بات کریں گے۔

یہ بات اس وقت سامنے آئی جب اسرائیلی حکام نے بدھ کو ایرانی اہداف کی ایک متوقع فہرست کا اشارہ دیا جو منگل کو تہران کی طرف سے شروع کئے گئے حملے کے بڑے اسرائیلی ردعمل کے دائرہ کار میں آسکتی ہے۔

واضح رہے اسرائیل نے فیصلہ کن اور دردناک جواب کی دھمکی دیتے ہوئے اس بات کی تصدیق کی تھی کہ تہران اپنے اقدام پر پچھتائے گا، ایرانی صدر مسعود پیزشکیان نے زور دے کر کہا تھا کہ اگر اسرائیل نے ایک اور غلطی کی تو ان کے ملک کا ردعمل دوگنا تباہ کن ہو گا۔

یہ بھی پڑھیں : اسرائل کی جوابی کارروائی کی دھمکی، ایرانی صدر کا اینٹ کا جواب پتھر میں دینے کا اعلان

ایرانی وزیر خارجہ عباس عراقچی نے بھی اعلان کیا ہے کہ اسرائیل کی طرف سے کسی بھی نئے اقدام کو سخت ردعمل کا سامنا کرنا پڑے گا۔