ٹوئٹر کا لوگو تبدیل، چڑیا کی جگہ کونسے جانور نے لی؟

(ویب ڈیسک) ایلون مسک نے ٹوئٹر کا لوگو تبدیل کر دیا ،چڑیا، کو اڑا کر ،کتے، کو لوگو بنا دیا گیا ہے۔

ٹوئٹر کے سی ای او ایلون مسک نے جب سے ٹوئٹر کو خریدا ہے تب سے اس میں بڑی تبدیلیاں ہو رہی ہیں اور ان تبدیلیوں کا سلسلہ کہیں تھمنے کا نام ہی نہیں لے رہا۔ اس بار ایلون مسک کی جانب سے ٹوئٹر کا لوگو ہی بدل دیا گیا ہے۔اب سے صارفین کو نیلے رنگ کی چڑیا کی جگہ ،ڈوج، یعنی کتا نظر آیا کرے گا۔ 

مائیکروبلاگنگ ویب سائٹ ٹوئٹر کی تاریخ میں سب سے بڑی تبدیلی ہوئی ہے، اپنے حیران کن فیصلوں کی وجہ سے شہرت پانے والے اس کے مالک ایلون مسک نے ٹوئٹر کے لوگو کی نیلی چڑیا کی چھٹی کروا کر صارفین کو ایک اور بڑا سرپرائز دیا ہے۔ صارفین کو ٹوئٹر کے ویب پیج پر جانے سے نیلی چڑیا کی جگہ کتے کی تصویر نظر آ رہی ہے۔

مزید پڑھیں:  ملک میں موسم کی صورتحال

تاہم اس وقت  یہ تبدیلی صرف ویب پیج پر ہی کی گئی ہے اور ٹوئٹر ایپ پر ابھی بھی نیلی چڑیا والا لوگو ہی نظر آ رہا ہے۔ ہوم بٹن کے طور پر نظر آنے والی ٹوئٹر کی نیلی چڑیا کی بجائے اب صارفین کو کتے کی تصویر نظر آ رہی ہے اس کے ساتھ ساتھ پیج ری فریش کرنے پر آنے والی چڑیا کی جگہ بھی کتے نے لے لی ہے۔ 

As promised pic.twitter.com/Jc1TnAqxAV

— Elon Musk (@elonmusk) April 3, 2023

سماجی رابطوں کی ویب سائٹ ٹوئٹر پر ایک ٹوئٹ میں ایلون مسک نے لکھا کہ اپنے وعدے کے مطابق میں نے لوگو تبدیل کر دیا ہے۔ واضح رہے کہ ٹوئٹر کو خریدنے سے پہلے ایک صارف نے انہیں کہا  تھا کہ ٹوئٹر کو خرید کر اس کے نیلے رنگ والی چڑیا والے لوگو کو ڈوج سے بدل دیں۔ 

pic.twitter.com/wmN5WxUhfQ

— Elon Musk (@elonmusk) April 3, 2023

ایلون مسک کی جانب سے کی جانے والی تبدیلی کے بعد انہوں نے ایک اور ٹوئٹ میں ڈوج میم کو شیئر کیا جس میں ایک پولیس اہلکار ڈرائیور کے لائسنس کا جائزہ لے رہا ہے اس کے ہاتھ میں ٹوئٹر کی نیلی چڑیا والی تصویر ہوتی ہے جبکہ ڈرائیونگ سیٹ پر بیٹھا ڈوج کہتا ہے کہ یہ میری پرانی تصویر ہے۔

واضح رہے کہ ڈوج کرپٹو کرنسی کی علامت سمجھا جاتا ہے جسے 2013 میں دیگر کرپٹو کرنسیوں کے سامنے مذاق کے طور پر لانچ کیا گیا تھا۔