سائنسدانوں نے دنیا کا سب سے چھوٹا پیس میکر تیار کرلیا

(ویب ڈیسک)سائنسدانوں نے دل کے امراض کے شکار افراد کے لیے دنیا کا سب سے چھوٹا پیس میکر تیار کرلیا۔

یہ پیس میکر اتنا چھوٹا ہے کہ کسی سرنج کے سرے کے اندر بھی فٹ ہوسکتا ہے،یعنی اسے انجیکشن کے ذریعے بھی جسم کے اندر داخل کیا جاسکتا ہے اور مریضوں کو تکلیف دہ طویل سرجری کی ضرورت نہیں ہوگی۔

اس پیس میکر کو امریکا کی نارتھ ویسٹرن یونیورسٹی کے ماہرین نے تیار کیا ہے جو جسم میں کچھ عرصہ رہنے کے بعد خون میں تحلیل ہو جاتا ہے۔

اس پیس میکرکو ایسے مریضوں کے لیے ڈیزائن کیا گیا ہے جن کے دل کو مختصر المدت کے لیے مدد کی ضرورت ہوتی ہے۔

اس پیس میکر کو ایسی وائرلیس وئیرایبل ڈیوائس سے منسلک کیا جاسکتا ہے جو مریض کے سینے پر لگائی جاسکتی ہے،جب اس چھوٹی ڈیوائس کو دل کی دھڑکن میں بے ترتیبی کا علم ہوتا ہے تو اس پر ایک لائٹ چمکنے لگتی ہے جس سے پیس میکر متحرک ہو جاتا ہے۔

ڈیوائس کی روشنی مریض کی جِلد، ہڈیوں اورمسلز سے گزرنے کی صلاحیت رکھتی ہے،اگرچہ یہ پیس میکر بہت چھوٹا ہے اور اس کی موٹائی ایک ملی میٹر کے قریب ہے مگر یہ کسی بڑے پیس میکر جتنا کام کرسکتا ہے۔

سائنسدانوں کے مطابق اس ڈیوائس کے جانوروں اور انسانوں پر تجربات کامیاب رہے ہیں، اس کی تیاری کا بنیادی مقصد دل کے نقص کے شکار نومولود بچوں کے علاج میں مدد فراہم کرنا ہے،دنیا بھر میں ایک فیصد بچوں کی پیدائش دل میں نقص کے ساتھ ہوتی ہے اور سرجری کے 7 دن بعد ان بچوں کے دل خودکار طور پر ٹھیک ہو جاتے ہیں،مگر یہ 7 دن بہت زیادہ اہم ہوتے ہیں۔

 یہ بھی پڑھیں:پراپرٹی ٹیکس جمع نہ کرانیوالوں کی شامت،گرفتاریوں کاحکم

اس ڈیوائس کے حوالے سے تحقیق کے نتائج جرنل نیچر میں شائع ہوئے ہیں۔