(ویب ڈیسک)پاسپورٹ انڈیکس میں بھارتی پاسپورٹ ایک درجےنیچے گر گیا، 199ممالک کی فہرست میں148ویں مقام پر پہنچ گیا۔
میڈیا رپورٹس کے مطابق رواں سال کے پاسپورٹ انڈیکس کے سب سے نیچے پاکستان، عراق، ایریٹیریا، یمن اور افغانستان رہے جو بالترتیب 195ویں مقام سے 199 ویں مقام پر ہیں۔نوماد کیپیٹلسٹ پاسپورٹ انڈیکس 2025کی تازہ ترین رپورٹ کے مطابق بھارت دنیا کے طاقتور ترین پاسپورٹس کی فہرست میں 147 ویں مقام سے گر کر 148ویں مقام پر آ گیا ہے۔ یہ اشاریہ، ٹیکس اور امیگریشن کنسلٹنسی فرم نوماد کیپیٹلسٹ کی جانب سے جاری کیا جاتا ہے جو ہر سال مختلف ممالک کے پاسپورٹس کی طاقت کا جائزہ لیتی ہے۔ اشاریہ میں پاسپورٹس کی درجہ بندی پانچ معیارات کی بنیاد پر کی جاتی ہے: ویزا کے بغیر سفر (50 فیصد نمبرز)، ٹیکس نظام (20 فیصد نمبرز)، عالمی تاثر (10فیصد نمبرز)، دہری شہریت (10فیصد نمبرز) اور ذاتی آزادی (10 فیصد نمبرز)۔
اس سال کے اشاریہ میں بھارت کا اسکو47.5رہا۔ بھارت مشرقی افریقی ملک کوموروس کے ساتھ 148 ویں مقام پر رہا۔ گزشتہ سال بھارت موزمبیق کے ساتھ 147ویں رینک پر تھا۔ آئرلینڈ کے پاسپورٹ کو اس سال دنیا کا طاقتور ترین پاسپورٹ قرار دیا گیا کیونکہ آئرش شہریوں کو یورپی یونین اور برطانیہ میں رہنے اور کام کرنے کے بہتر حقوق حاصل ہیں۔ سوئزرلینڈ دوسرے مقام پر رہا جبکہ یونان، پرتگال، مالٹا، اٹلی، لکسمبرگ، فن لینڈ، ناروے، متحدہ عرب امارات، نیوزی لینڈ اور آئس لینڈ سر فہرست10 ممالک میں جگہ بنانے میں کامیاب رہے۔ امریکہ، یورپ کے سان مارینو کے ساتھ 45ویں مقام پر رہا۔ یاد رہے کہ رواں سال جنوری میں جاری کئے گئے ہینلی پاسپورٹ انڈیکس، جو انٹرنیشنل ایئر ٹرانسپورٹ ایسوسی ایشن کے ڈیٹا پر مبنی ہوتا ہے، میں بھارت 80 ویں مقام سے گر کر85ویں مقام پر آ گیا ہے۔
یہ بھی پڑھیں:مجھے گرفتار کیوں کیا ،تذلیل سے دلبرداشتہ ہو کر پارٹی کارکن نے خودکشی کرلی