(24نیوز)شاہراہوں پر لین کی پابندی سلامتی کے لئے ضروری ہے،سعودی محکمہ ٹریفک نے قوانین کی خلاف ورزی کرنے والوں کو خبردار کردیا
تفصیلات کے مطابق سعودی محکمہ ٹریفک نے خبر دار کیا ہے کہ گاڑی چلاتے ہوئے لین کی خلاف ورزی کرنے والے ڈرائیوروں کیخلاف جدید نظام کے تحت ازخود جرمانہ عائد ہوجائے گا۔اس حوالے سے ترجمان محکمہ ٹریفک نے کہا ہے کہ طائف، باحہ، الجوف اور جازان میں لین کی پابندی نہ کرنے کی خلاف ورزی کا خود کار سسٹم سے اندراج7 دن بعد شروع ہوگا۔سعودی ذرائع ابلاغ کے مطابق محکمے نے اپنے ٹوئٹر اکاؤنٹ میں کہا ہے کہ لین کی پابندی نہ کرنے کی خلاف ورزی کا خود کار سسٹم کے تحت اندراج اس سے پہلے ریاض، جدہ اور دمام میں ہو چکا ہے۔ترجمان کے مطابق یہ جرمانہ اب اسے طائف، باحہ، الجوف اور جازان میں نافذ کیا جا رہا ہے جس کا اطلاق 7 دن کے بعد ہوگا۔
ذرائع کے مطابق ،شاہراہوں پر لین کی پابندی سلامتی کے لئے ضروری ہے، اس کی خلاف ورزی پر300 ریال سے500 ریال تک جرمانہ ہو سکتا ہے۔مذکورہ شہروں میں خلاف ورزی کے خود کار اندراج کے لئے اسمارٹ کیمروں کی تنصیب ہوچکی ہے نیز اسے تجرباتی مراحل سے بھی گزارا جا چکا ہے۔محکمے نے کہا ہے کہ لین کی تبدیلی کے وقت خلاف ورزی سے بچنے کے لئےضروری ہے کہ ڈرائیور پہلے اپنی اور دوسروں کی سلامتی کو یقینی بنائیں۔ڈرائیور لین تبدیل کرنے سے مناسب وقت پہلے اشارہ دے اور یقین کرلے کہ جس لین کی طرف منتقل ہونے جا رہا ہے وہ ٹریفک سے خالی ہے۔اور اس سے زیادہ اہم بات یہ ہے کہ وہ اس بات کا یقین کرلے کہ جس لین کی طرف ڈرائیور منتقل ہونے جا رہا ہے وہاں چلنا ٹریفک خلاف ورزی تونہیں۔