(24نیوز)وفاقی وزیر اطلاعات شبلی فراز کا کہنا ہے کہ دنیا میں کورونا سے نبردآزما ہونے کیلئے 10 نکاتی پلان عمران خان کی قائدانہ صلاحیتوں کا منہ بولتا ثبوت ہے۔
تفصیلات کے مطابق وزیر اطلاعات شبلی فراز نے کہا کہ غریب ممالک کیلئے پانچ سو ارب ڈالرکے فنڈ کا قیام، غریب ممالک کے قرض کی معافی، کرپٹ سیاستدانوں اور مجرموں سے لوٹی دولت کی واپسی کے لئےوزیراعظم کا واشگاف اظہار درحقیقت غریب کی آواز ہے۔ عمران خان واحد لیڈر ہیں جو ہر کورونا متاثرہ ملک کے لئے مساوی ویکسین کی فراہمی کی بات کررہے ہیں۔
انہوں نے کہا کہ کورونا کی پہلی لہر میں پاکستان کی کامیاب حکمت عملی آج دنیا کے لئے باعث تقلید ہے۔
یاد رہے کہ وزیر اعظم عمران خان نےاقوام متحدہ کے خصوصی اجلاس سے ویڈیو لنک کے ذریعے اپنے خطاب میں کورونا وبا سے نمٹنے کے لئے 10 نکاتی ایجنڈا پیش کیا ہے۔