چینی ویکسین  60 سال سے زائد عمر کے افراد کو نہیں لگائی جاسکتی

 (24نیوز) وزارت صحت کے حکام کا کہنا ہےکہ کورونا وائرس کی چینی ویکسین سائنو فارم 60 سال سے زائد عمر کے افراد کو نہیں لگائی جاسکتی۔

تفصیلات کے مطابق  وزارت صحت کے حکام کے ہمراہ صحافیوں سے گفتگو کرتے ہوئے وزیراعظم کے معاون خصوصی ڈاکٹر فیصل سلطان نےکہا کہ 60 سال سے زائد العمر افراد کے لیے ایسٹرا زینیکا اور دیگر ویکسینز کا انتظار ہے، برطانوی کمپنی ایسٹرا زینیکا کی ویکسین اس مہینے میں پاکستان آ جائے گی۔انہوں نے کہا کہ محدود مقدار میں فائزر کمپنی کی میسنجر آر این اے ویکسین بھی مارچ میں آجائے گی جب کہ روسی ویکسین اسپوٹنک بھی اسی سہ ماہی میں دستیاب ہونے کا امکان ہے جو بوڑھے افراد کو لگائی جاسکتی ہے۔

ڈاکٹر فیصل نے کہا تھا کہ سائنو فارم ویکسین ڈیٹا کی کمی کی وجہ سے 60 سال سے زائد العمر، حاملہ اور دودھ پلانے والی خواتین کو نہیں لگائی جاسکتی۔دوسری جانب پاکستانی حفاظتی ٹیکہ جات کے حکام نے بھی سائنو فارم ویکسین کے حوالے سے ایس او پیز جاری کردی ہیں۔