(24 نیوز)پشاور میں تقریباً بیس سال بعد ارباب نیاز کرکٹ سٹیڈیم میں میچز کروانے کے امکانات پر غور شروع ہوگیا ہے۔
پاکستان کرکٹ بورڈ (پی سی بی) کی جانب سے اپریل میں پاکستان سپر لیگ (پی ایس ایل) کے دو میچز پشاور میں کروانے پر غور کیا جا رہا ہے، اس سلسلے میں انٹرنیشنل کرکٹ کونسل (آئی سی سی) کے نمائندے نے سٹیڈیم کا دورہ کیا، جہاں پولیس حکام نے انہیں سکیورٹی صورتحال پر بریفنگ دی۔
پولیس حکام کے مطابق، غیر ملکی کھلاڑیوں کے لیے گراؤنڈ، پولین ایریا، ہوٹل روٹ اور اسٹیڈیم کے اطراف سکیورٹی انتظامات کا جائزہ لیا گیا،عوام کی سہولت کے لیے شٹل سروس، ڈرون کیمروں سے مانیٹرنگ اور اسٹیڈیم کے قریب ہیلی پیڈ بنانے کی تجویز بھی زیر غور ہے۔
مزید پڑھیں :پی ایس ایل کو نئے خریدار مل گئے، 2 نئی ٹیمیں کون سی ہونگی؟
پولیس حکام نے یقین دہانی کرائی ہے کہ غیر ملکی کھلاڑیوں کے لیے سکیورٹی کے تسلی بخش انتظامات کیے جائیں گے۔
یاد رہے کہ ارباب نیاز اسٹیڈیم میں آخری بین الاقوامی میچ 2006 میں پاکستان اور بھارت کے درمیان کھیلا گیا تھا۔