اسرائیل کے غزہ پر 36 گھنٹے میں 34 فضائی حملے، 2 صحافیوں سمیت 140 فلسطینی شہید

( ویب ڈیسک ) اسرائیل جنگی جنون میں مبتلا، غزہ کی پٹی پر گزشتہ 36گھنٹے میں 34 تباہ کن فضائی حملے کردیئے۔

صیہونی  فورسز کے فضائی حملوں میں 2 صحافیوں سمیت 140سے زائد فلسطینی شہید ہوگئے جبکہ درجنوں افراد زخمی بھی ہوئے، بمباری سے متعدد فلسطینیوں کا ملبے تلے دب جانے کا خدشہ ہے، ملبے تلے دبے افرادکو نکالنے کیلئے امدادی کارروائیاں جاری ہیں۔

انٹرنیشنل میڈیا کے مطابق 7 اکتوبر 2023 سے جاری جنگ میں اب تک کم از کم 45,658 فلسطینی شہید اور 108,583 زخمی ہو چکے ہیں جبکہ حماس کے حملوں کے دوران اسرائیل میں کم از کم 1,139 افراد ہلاک اور 200 سے زائد کو یرغمال بنا لیا گیا تھا۔

قطر میں حماس اور اسرائیل میں غزہ جنگ بندی کیلئے مذاکرات کے نئے دور کا آغازہوگیا، حماس نے مطالبہ کیا کہ جنگ بندی کیلئے غزہ کی پٹی سے صیہونی فوج کا انخلا اور مستقل سیز فائر ضروری ہے۔