ذاتی طور پر روٹی، آٹے کی قیمت چیک کروں گی،مریم نواز نے حکام کو خبردار کر دیا 

(24نیوز)وزیر اعلیٰ پنجاب مریم نواز شریف نے پورے صوبے میں روٹی، آٹے اور آٹے سے بنی اشیاء کی قیمتوں کو سختی سے برقرار رکھنے کی ہدایت کی ہے۔

وزیر اعلیٰ پنجاب مریم نواز شریف نے ہدایت کی ہے کہ  آٹے کی قیمت میں کمی کا پورا فائدہ عوام کو منتقل  اورسرکاری قیمتوں کی خلاف ورزی کرنے والوں سے قانون کے مطابق سختی سے نمٹا جائے۔

وزیر اعلیٰ مریم نواز نے حکام کو خبردار کر دیا ہے کہ ذاتی طور پر روٹی، آٹے کی قیمت چیک کروں گی، عوام سے فیڈ بیک لوں گی، پنجاب کی انتظامیہ صفائی مہم کے جذبے سے کام کرے۔پنجاب بھر کی انتظامیہ کو سخت چیکنگ کی ہدایات جاری کر دی گئیں۔

 وزیر اعلیٰ نےذخیرہ اندوزی، ناجائز منافع خوری  کرنے والوں کے خلاف سخت آپریشن کرنے کی بھی ہدایت کردی،ان کا کہنا ہے کہ فوڈ اتھارٹی، اربن یونٹ، پولیس مقامی انتظامیہ کی معاونت سے کام کریں۔

 اس حوالے سے سپیشل برانچ کو بھی متحرک کردیاگیا، سپیشل برانچ ذخیرہ اندوزوں، ناجائز منافع خوروں اور زائد قیمت وصول کرنے والوں کی انٹیلی جنس رپورٹ فراہم کرے گی۔وزیر اعلی پنجاب کی ہدایات پر عملدرآمد کے لئے پورے صوبے کی انتظامیہ متحرک ہو گئی،چیف سیکرٹری پنجاب نے کمشنرز، ڈپٹی کمشنرز، میجسٹریٹس اور متعلقہ حکام کو فیلڈ میں خود نکل کر مانیٹرنگ کرنے کی ہدایت کی ہے۔