عمران خان نے معاشرے میں نفرتوں کی جو آگ لگائی،اب خود ہی اس آگ میں جلنے والے ہیں، مولانا فضل الرحمن

(24نیوز) پی ڈی ایم کے سربراہ مولانا فضل الرحمن نے 24 نیوز ڈیرہ اسماعیل خان کے رپورٹر ساجد بلوچ سے خصوصی گفتگو کرتے ہوئے کہا ہے کہ عمران خان نے معاشرے میں نفرتوں کی جو آگ لگائی،اب خود ہی اسی آگ میں جلنے والے ہیں،سیاست میں اندھی مذہبی جنونیت کا استعمال انہیں لے ڈوبے گا۔
 وزیرآباد واقعہ پہ ردعمل دیتے ہوئے مولانا فضل الرحمن نے کہا کہ واقعہ پنجاب کی حدود میں پیش آیا،جہاں پی ٹی آئی کی اپنی حکومت ہے،ملزم کو پی ٹی آئی کارکن نے پکڑ کے پنجاب پولیس کے حوالہ کیا اور پنجاب پولیس نے ہی ملزم سے بیان لیا جس میں ملزم نے اعتراف جرم کیا کہ عمران دین کی توہین کے مرتکب ہوئے ہیں لیکن عمران خان اور اس کے رفقا بلاتحقیق وزیراعظم، رانا ثناءاللہ اور آئی ایس آئی کے افسران پہ الزام لگا کر اشتعال پھیلا رہے ہیں،جس سے معاملہ مشکوک ہو گیا ہے،چنانچہ اس معاملہ کی اعلی سطحی تحقیقات ضروری ہو گئی ہے تاکہ قوم کو اصل حقائق سے باخبر رکھا جا سکے۔ مولانا فضل الرحمن نے کہا کہ ایسے واقعات کو سیاسی مقاصد کے لئے استعمال کرنے کے نتائج خطرناک ہوں گے، کل کوئی تیسری قوت فائدہ اٹھا کر ملک و قوم کو مشکل میں ڈال سکتی ہے۔ ان کا کہنا تھا کہ عمران مذہب سے ناوقف ہیں لیکن ہر معاملہ میں مذہبی ٹچ دیکر اپنے کارکنوں کو گمراہ کرنے کے علاوہ مذہبی جنونیت کو فروغ دے رہیں جس کے نتائج ملک اور معاشرہ کے علاوہ خود عمران اور اس کی جماعت کے لئے بھی اچھے نہیں ہوں گے۔