اداکارہ شیری شاہ نے شمعون عباسی سے شادی کی تصدیق کردی

(ویب دیسک)پاکستانی ڈرامہ و فلم انڈسٹری کی معروف اداکارہ شیری شاہ نے اداکار،فلم ڈائریکٹر و رائٹر شمعون عباسی سے شادی کی تصدیق کر دی ہے۔

تفصیلات کے مطابق 2022ئ میں اداکار شمعون عباسی اور شیری شاہ کی شادی کی افواہیں زیرِ گردش تھیں، اِن افواہوں کی وجہ شیری شاہ کا اپنی ڈسپلے پکچر پر شمعون عباسی کے ساتھ ایک تصویر لگانا تھا.شادی کی افواہیں پھیلنے کے بعد دونوں فنکاروں کی جانب سے شادی کی تصدیق یا تردید نہیں کی گئی تھی۔

واضح رہے کہ اداکار شمعون عباسی انڈسٹری کے ایک کامیاب اداکار ہیں جو کہ شیری شاہ کے ہمراہ آخری بار فلم درج میں نظر آئے تھے، جس میں دونوں اداکاروں کی کیمسٹری کوبہت پسند کیا گیا تھا۔

اب اداکارہ شیری شاہ نے شمعون عباسی کو سالگرہ کی مبارکباد دیتے ہوئے انہیں اپنا شوہر تسلیم کر لیا ہے۔سوشل میڈیا پلیٹ فارم فیس بک پوسٹ پر اداکارہ شیری شاہ نے شمعون عباسی کے ہمراہ ایک تصویر شیئر کرتے ہوئے انہیں ٹیگ کیا ہے اور لکھا ہے کہ" میں آپ کی بہت سی چیزوں کی تعریف کرتی ہوں، آپ کی طاقت، آپ کا پرسکون رہنا، آپ کا کردار اور دیانتداری، آپ کی حسِ مزاح، آپ کا دنیا کی خوبصورتی دیکھنے کا انداز، آپ کے ساتھ رہنے میں بہت مزہ آرہا ہے اور یہی وجہ ہے کہ میری زندگی بہت خوبصورت ہو گئی ہے"۔

شیری شاہ کا اس پوسٹ میں مزید لکھنا ہے کہ "میری زندگی میں سب سے اچھی چیز ہونے کا شکریہ، میں آپ کو اپنے جیون ساتھی کے طور پر پا کر بہت خوش قسمت محسوس کرتی ہوں، سالگرہ مبارک ہو "ہبی" (خاوند)"۔

واضح رہے کہ اس سے قبل اداکار شمعون عباسی تین شادیاں کرچکے ہیں۔ان کی پہلی بیوی اداکارہ جویریہ عباسی تھیں جن سے ان کی ایک بیٹی انزیلہ عباسی بھی ہیں۔اداکار شمعون عباسی نے دوسری شادی اداکارہ حمائمہ ملک سے 2010میں کی تھی جوبمشکل 2 سال ہی چل سکی۔اداکا ر شمعون عباسی نے تیسری شادی مبینہ طور پر جویریہ رندھاوا نامی خاتون سے کی تھی جن سے ان کی ایک بیٹی بھی ہے تاہم اس شادی کا اختتام بھی طلاق پر ہوا۔

دوسری جانب اداکارہ شیری شاہ کی بھی یہ دوسری شادی ہے۔اداکارہ نے 2013میں ڈاکٹر ملک انور سے شادی کی تھی تاہم یہ شادی ایک سال میں ہی ختم ہوگئی تھی۔اداکارہ نے اپنے شوہر پر ھوکہ دہی اور جھوٹ بول کر شادی کرنے کا الزام عائد کیا تھا۔