معروف ہالی ووڈ اسٹار پر ریپ کے سنگین الزامات عائد

 (ویب ڈیسک)معروف برطانوی اداکار اور کامیڈین رسل برانڈ پرریپ اور جنسی ہراسانی کے الزامات عائد کردیئے گئے۔

لندن کی میٹروپولیٹن پولیس کے مطابق یہ الزامات مختلف ادوار میں پیش آنے والے والے واقعات سے متعلق ہیں،تاہم رسل برانڈ نے ان الزامات کی تردید کرتے ہوئے کہا ہے کہ ان کے تمام تعلقات باہمی رضامندی سے تھے۔

غیرملکی خبررساں ادارے کے مطابق رسل برانڈ پر دو مرتبہ جنسی زیادتی، ایک بار زبردستی جنسی عمل اور ایک بار جنسی حملے کا الزام عائد کیا گیا ہے جو چار مختلف خواتین کی جانب سے سامنے آئے جنہوں نے پولیس سے رجوع کیا تھا۔

پولیس کا کہنا ہے کہ اس کیس کی تحقیقات جاری ہیں، اور متاثرہ خواتین یا معلومات رکھنے والے افراد سے رابطے کی اپیل کی گئی ہے۔

یہ معاملہ ستمبر 2023 میں منظر عام پر آیا، جب مختلف اخبارات نے الزامات پر مبنی رپورٹس شائع کیں۔"بی بی سی" کی رپورٹ کے مطابق 1999 سے 2005 کے درمیان لندن اور بورنماؤتھ کے مختلف علاقوں میں مبینہ واقعات پیش آئے تھے۔

یہ بھی پڑھیں:پاکستانی ناول نگار علشبہ بڑیچ نے"ینگ وومن آف دی ایئر"ایوارڈاپنے نام کرلیا

واضح رہے کہ 49 سالہ رسل برانڈ 2 مئی کو لندن کی عدالت میں پیش ہوں گے۔ رسل برانڈ، اسٹینڈ اپ کامیڈی سے شہرت پانے کے بعد ٹی وی، ریڈیو اور فلموں کا حصہ بنے،وہ ماضی میں بھی اپنے متنازع بیانات اور ذاتی زندگی کی وجہ سے خبروں کا حصہ رہ چکے ہیں۔