(ویب ڈیسک) خیبرپختونخوا کے ضلع شانگلہ کے علاقے مٹہ اغوان میں سوات جانے والی کار کھائی میں جا گری جس کے نتیجے میں ملتان سے تعلق رکھنے والے 4 سیاح جاں بحق ہو گئے۔
ترجمان ریسکیو1122شانگلہ کے مطابق سیاح بشام سے سوات جا رہے تھے کہ بشام سوات روڈ پر مٹہ اغوان کے علاقے میں حادثہ پیش آیا،انہوں نے بتایا کہ اس حادثے میں 4سیاحوں کی موقع پر ہی موت ہو گئی جبکہ ایک شخص زخمی ہو گیا۔
ترجمان کے مطابق ریسکیو 1122 کی ٹیم فوراً موقع پر پہنچ گئی اور لاشوں اور زخمیوں کو الپوری ڈسٹرکٹ ہیڈ کوارٹر ہسپتال منتقل کیا،الپوری اسٹیشن ہاؤس افسر محمد عارف خان نے واقع کی تصدیق کی۔
انہوں نے بتایا کہ جاں بحق ہونے والوں کی شناخت حسن خان، جواد خان، محمد عمیر اور حماد خان کے نام سے ہوئی، مزید کہنا تھا کہ حادثے میں زخمی ہونے والے شخص کی شناخت دلاور خان کے نام سے ہوئی ہے۔
پولیس کا کہنا ہے کہ جاں بحق ہونے والے تمام افراد کا تعلق ملتان کے علاقے نواب پور سے ہے۔
ایس ایچ او نے مزید بتایا کہ وہ لاشوں کو ان کے آبائی علاقوں کو روانہ کرنے کے انتظامات کر رہے ہیں جبکہ زخمی کو مزید علاج کے لیے سوات کے ہسپتال منتقل کر دیا گیا،ان کا کہنا تھا کہ فوری طور پر حادثے کی وجہ معلوم نہیں ہوسکی تاہم ریسکیو 1122 کی ٹیم نے گاڑی کو قبضے میں لے لیا۔
واضح رہے کہ ملک کے پہاڑی علاقوں میں ٹریفک قوانین کی خلاف ورزیوں اور ناقص انفراسٹرکچر کی وجہ سے سڑکوں پر جان لیوا حادثات عام ہیں۔
گزشتہ ہفتے شانگلہ کے علاقے کوٹکے میں پھسلن اور شدید بارش کے دوران ایک جیپ کھائی میں گرنے سے ایک خاندان کے کم از کم 5 افراد کی موت ہو گئی تھی جبکہ3دیگر شدید زخمی ہو گئے تھے۔
یہ بھی پڑھیں: پنجاب میں نئے کار واش سٹیشنز بنانے پر پابندی عائد