امت مسلمہ اتحاد سے مسئلہ کشمیر و فلسطین حل کرے، علامہ طاہر اشرفی

(24 نیوز)وزیراعظم کے معاون خصوصی حافظ علامہ طاہر اشرفی نے امت مسلمہ پر زور دیا ہے کہ وہ اتحاد سے مسئلہ کشمیر و فلسطین اور دیگر امور حل کرے۔
تفصیلات کے مطابق چیئرمین پاکستان علماکونسل و نمائندہ خصوصی وزیراعظم برائے بین المذاہب ہم آہنگی و مشرق وسطیٰ حافظ طاہر اشرفی نے کہا ہے کہ امیر کویت نواف الاحمد جابر الصباح کی طرف سے خلیجی ممالک کے درمیان تعلقات کی بحالی کی کوششیں قابل ستائش عمل ہے۔
ایک بیان میں علامہ طاہر اشرفی کا کہنا تھا کہ سعودی عرب، قطر اور دیگر خلیجی عرب اسلامی ممالک کی طرف سے برادر اسلامی ممالک میں معاملات کی اصلاح کی کوششوں کا خیر مقدم امت مسلمہ کےلئے نوید صبح ہے۔
انہوں نے کہا کہ پاکستان کی ہمیشہ کوشش رہی ہے کہ اسلامی ممالک کے درمیان غلط فہمیاں دور ہوں اور امت مسلمہ وحدت اور اتحاد سے مسئلہ کشمیر و فلسطین اور دیگر امور کو حل کرے۔علامہ طاہر اشرفی کا کہنا تھا کہ پاکستان اپنے برادر اسلامی عرب ممالک کے ساتھ ہر مرحلے پر کھڑا ہے اور پاکستان کے عرب اسلامی ممالک کے ساتھ تعلقات میں مسلسل بہتری آ رہی ہے۔