پیٹ کمنز کے چیمپئنز ٹرافی سے باہر ہونے کا امکان    

(24  نیوز)آسٹریلیا کرکٹ ٹیم کے کپتان پیٹ کمنز کے انٹرنیشنل کرکٹ کونسل (آئی سی سی) چیمپئنز ٹرافی سے باہر ہونے کا امکان ہے۔

پیٹ کمنز ٹخنے کی تکلیف کا شکار ہیں تاحال انہوں نے باؤلنگ شروع نہیں کی، ان کی غیر موجودگی میں سری لنکا کے خلاف جاری ٹیسٹ سیریز میں سٹیو اسمتھ کپتانی کر رہے ہیں۔

آسٹریلوی ہیڈ کوچ اینڈریو میکڈونلڈ نے شدید خدشے کا اظہار کر دیا اور کپتانی کے لیے ٹریوس ہیڈ اور  سٹیو اسمتھ سے بات چیت کی بھی تصدیق کر دی۔

 اینڈریو میکڈونلڈ کا کہنا ہے کہ پیٹ کمنز نے ابھی باؤلنگ کا آغاز نہیں کیا ہے، ان کی انجری کی وجہ سے چیمپئنز ٹرافی سے باہر ہونے کا قوی امکان ہے۔

مزید پڑھیں:راشد خان کا ٹی ٹوئنٹی میں اہم اعزاز ، سب کو پیچھے چھوڑ دیا 

انہوں نے کہا کہ پیٹ کمنز کی غیرموجودگی میں ہمیں نئے کپتان کی ضرورت ہو گی،  سٹیو اسمتھ اور ٹریوس ہیڈ کے ساتھ کپتانی پر بات چیت چل رہی ہے۔

آسٹریلوی ہیڈ کوچ کا کہنا ہے کہ آئندہ چند روز میں میڈیکل رپورٹس آنے کے بعد صورتِ حال واضح ہو گی۔

آسٹریلوی ون ڈے  سکواڈ جمعرات کو دورۂ سری لنکا کے لیے روانہ ہو گا، پیٹ کمنز  سکواڈ کے ہمراہ سری لنکا نہیں جائیں گے۔

یاد رہے کہ آل راؤنڈر مچل مارش فٹنس مسائل کے باعث پہلے ہی چیمپئنز ٹرافی سے باہر ہو چکے ہیں۔