رکشہ ڈرائیور کی سابق بھارتی کرکٹر کی گاڑی کو ٹکر، سڑک پر تماشہ لگ گیا

( 24 نیوز )بھارتی کرکٹ ٹیم کے سابق ہیڈ کوچ اور لیجنڈری کرکٹر راہول ڈریوڈ اپنے آبائی شہر بنگلور میں ایک آٹو رکشہ سے گاڑی ٹکرانے کے بعد اپنے غصے پر قابو نہ رکھ سکے۔

تفصیلات کے مطابق  واقعہ کننگھم روڈ پر پیش آیا، جہاں یم چناسوامی سٹیڈیم کے قریب ایک آٹو رکشہ کی معمولی ٹکر کے بعد راہول ڈریوڈ کو آٹو ڈرائیور کے ساتھ سنجیدہ بحث کرتے ہوئے دیکھا گیا۔ عام طور پر پرسکون طبیعت کے حامل راہول ڈریوڈ کا یہ غیر متوقع ردعمل مداحوں کو حیران کر گیا.

 مزید پڑھیں:کوہلی کے پاس سچن ٹنڈولکر کا 19 سال پُرانا ریکارڈ توڑنے کا موقع  

واقعے کی ویڈیو سوشل میڈیا پر تیزی سے وائرل ہوگئی، جس میں ڈریوڈ کو آٹو ڈرائیور سے مایوسی اور برہمی کا اظہار کرتے ہوئے دیکھا جا سکتا ہے۔ خوش قسمتی سے حادثے میں کسی قسم کا جانی نقصان نہیں ہوا اور نہ ہی کوئی بڑا نقصان ہوا، تاہم، سوشل میڈیا صارفین نے موقع غنیمت جانتے ہوئے ’اندر نگر کا غنڈہ‘ کے عنوان سے مزاحیہ میمز بنانا شروع کر دیئے۔

 راہول ڈریوڈ نے حال ہی میں ٹی 20 ورلڈ کپ 2024 میں بھارتی ٹیم کی تاریخی جیت کے بعد ہیڈ کوچ کے عہدے کو خیرباد کہا۔ ان کی زیر قیادت، ٹیم انڈیا نے جنوبی افریقہ کو فائنل میں 7 رنز سے شکست دے کر 11 سال بعد آئی سی سی ٹرافی جیتی۔ اس شاندار کامیابی کے بعد، ڈریوڈ کو عزت و احترام کے ساتھ الوداع کیا گیا، اور وہ ٹرافی کے ساتھ جشن مناتے بھی نظر آئے۔

 مزید پڑھیں: جنوبی  افریقہ کو شکست ،بھارت نے انڈر 19 ویمنز ٹی 20 ورلڈکپ جیت لیا

بھارتی ٹیم سے رخصتی کے بعد، راہول ڈریوڈ نے اپنی سابقہ انڈین پریمیئر لیگ (آئی پی ایل) ٹیم راجستھان رائلز میں بطور ہیڈ کوچ شمولیت اختیار کر لی۔ ٹیم گزشتہ سیزن میں پلے آف تک پہنچی مگر کوالیفائر 2 میں ناک آؤٹ ہوگئی۔ اب تمام نظریں اس بات پر مرکوز ہیں کہ کیا ڈریوڈ بھارتی ٹیم کی طرح راجستھان رائلز کی بھی ٹرافی کی 17 سالہ پیاس بجھا پائیں گے یا نہیں؟

 راہول ڈریوڈ، جو اپنی بردباری اور تحمل کے لیے مشہور ہیں، کا یوں عوامی مقام پر غصہ دکھانا ان کے مداحوں کے لیے حیرت انگیز رہا۔ تاہم، یہ واضح نہیں کہ بحث کی اصل وجہ کیا تھی، لیکن ان کا یہ رویہ ان کی پرسکون شخصیت کے برعکس ضرور تھا۔