(ویب ڈیسک)بھارتی فلم انڈسٹری کے ہدایتکار سورج برجاتیا نے کہا ہے کہ بالی ووڈ کے دبنگ اسٹار سلمان خان کو فلم "پریم رتن دھن پایو" میں اداکارہ سونم کپور کے ساتھ رومانوی سین کرنے کے لیے 5 ماہ تک منایا گیا تھا۔
بھارتی میڈیا کے مطابق ہدایتکار سورج برجاتیا نے اپنے حالیہ انٹرویو میں سلمان خان اور سونم کپور کی بلاک بسٹر فلم "پریم رتن دھن پایو" کے بارے میں گفتگوکرتے ہوئے بتایاکہ جب میں نے سلمان خان کو "پریم رتن دھن پایو" کی مرکزی ہیروئن کا نام بتایا اور تصاویر دکھائیں تو وہ حیران رہ گئے تھے، پھر اُنہوں نے اس فلم میں کام کرنے سے متعلق سوچنے کے لیے مجھ سے کچھ وقت مانگ لیا تھا۔
سورج برجاتیا نے مزیدکہا کہ جب میں نے ایک ماہ بعد سلمان خان سے دوبارہ رابطہ کیا تو اُن کا کہنا تھا کہ وہ ابھی اپنے فیصلے پر غور کررہے ہیں کیونکہ سونم کپورعمر میں ان سے کافی چھوٹی ہیں،سونم میرے دوست کی بیٹی ہے اور میرے سامنے ہی بڑی ہوئی ہے تو میں اُس کے ساتھ رومانوی سین کیسے کرسکتا ہوں؟
ہدایت کارنے کہا کہ سلمان خان فلم "پریم رتن دھن پایو"میں کام کرنے کے لیے تو راضی ہوگئے تھے لیکن وہ سونم کپور کیساتھ رومانوی سین کرنے میں ہچکچا رہے تھے،میں نے سلمان خان کو فلم میں سونم کپور کے ساتھ رومانوی سین کرنے کے لیے تقریباً5 ماہ تک منایا اور پھر کہیں جاکر وہ راضی ہوئے۔
سال 2015 میں ریلیز ہونے والی سُپر ہٹ فلم "پریم رتن دھن پایو" 2015 کی دوسری سب سے زیادہ کمائی کرنے والی فلم بنی تھی۔