(ویب ڈیسک) بلوچستان کے دارالحکومت کوئٹہ سے تعلق رکھنے والے ننھے بچے ابو بکر کی ویڈیوز نے پاکستان کے بہترین اداکار و اداکاراؤں کیلئے خطرے کی گھنٹی بجا دی ہے۔
ان دنوں سوشل میڈیا پر ایک ننھا بھولا بھالا سا ابو بکر نامی بچہ بے حد مقبول ہو رہا ہے اور اس کی وجۂ شہرت اس کی کم عمری میں بہترین اداکاری ہے۔
ابو بکر فقط چار سال آٹھ ماہ کا بچہ ہے لیکن اس کی اداکاری بڑے بڑے اداکار اور اداکاراؤں کو مات دیتی معلوم ہو رہی ہے کیونکہ یہ ننھا بچہ ناصرف مردانہ آواز پر اداکاری کرتا ہے بلکہ عورت کا بھی روپ دھار کر بہترین اداکاری کے جوہر دکھاتا ہے۔
ابو بکر کوئٹہ سے تعلق رکھنے والا ایک افغانی بچہ ہے جس کی ویڈیوز اس کے والد بناتے ہیں اور وہ فوٹو اینڈ ویڈیو شیئرنگ ایپ انسٹاگرام پر ’بابا چی‘ نامی انسٹاگرام اکاؤنٹ پر شیئر کرتے ہیں۔
ابو بکر کبھی مزاحیہ ڈائیلاگز پر لپ سنک کرتا دکھتا ہے تو کبھی اپنی پیاری سی آواز اور ٹوٹی پھوٹی زبان میں مکالمے ادا کرتے ہوئے اپنے فن کا مظاہرہ کرتا ہے۔