سگے بھائیوں کی بازیابی کا کیس, عدالت کا نادرا کو شوکاز نوٹس

(24نیوز)سندھ ہائیکورٹ نے 2 سگے بھائیوں کی بازیابی کے کیس میں رپورٹ جاری نہ کرنے پر نادرا کو شوکاز نوٹس جاری کر دیا۔

سندھ ہائیکورٹ کے جسٹس نعمت اللہ پھلپھوٹو نے 2 سگے بھائیوں سمیت 6 لاپتہ افراد کی بازیابی سے متعلق درخواستوں پر سماعت کی،دوران سماعت عدالت نے تفتیشی افسران کی کارکردگی پر برہمی کا اظہار کیا اور جسٹس نعمت اللہ پھلپھوٹو نے تفتیشی افسر سعید رند کو جھاڑ پلا دی۔

جسٹس نعمت اللہ پھلپھوٹو نے ریمارکس دیتے ہوئے کہا کہ لاپتہ افراد کے مسئلے پر لوگ پریشان ہیں، عدالت آنا بند ہوگئے ہیں، اس وقت بہت الارمنگ صورتحال ہے۔

عدالت نے 2 شہریوں معاذ اور طلحہ سے متعلق رپورٹ جاری نہ کرنے پر نادرا کو شوکاز نوٹس جاری کردیا اور کمشنر کراچی، آئی جی سندھ اور سی آئی اے سے بھی رپورٹ طلب کر لی۔

سندھ ہائیکورٹ نے لاپتہ شہری زبیر سے متعلق تمام صوبوں اور ملک بھر کی جیلوں سے رپورٹ طلب کر لی، عدالت نے شہریوں کے کوائف اخبارات اور عوامی مقامات پر چسپاں کرنے کا حکم بھی جاری کر دیا۔

بعدازاں عدالت نے لاپتہ شہری زبیر سمیت دیگر کی ٹریول ہسٹری چار ہفتوں میں طلب کرتے ہوئے سماعت ملتوی کر دی۔