چاہتے ہیں پی ٹی آئی بھی گرینڈ ڈائیلاگ کا حصہ بنے، شاہد خاقان عباسی

 (24 نیوز)مسلم لیگ (ن)کے سینئر نائب صدر اور سابق وزیراعظم شاہد خاقان عباسی نے کہاہے کہ وزیراعظم نے تمام سٹیک ہولڈرز سے گرینڈ ڈائیلاگ کی بات کی ہے،سٹیک ہولڈرز میں فوج اور عدلیہ بھی شامل ہے، چاہتے ہیں پاکستان تحریک انصاف بھی گرینڈ ڈائیلاگ میں شریک ہو۔
میڈیا سے گفتگو کرتے ہوئے شاہد خاقان عباسی نے کہا کہ امید ہے وزیراعظم اس ڈائیلاگ میں سب کو مدعو کریں گے، سیاست اپنی جگہ اور ملک کا مفاد اپنی جگہ ہے، اتحادی جماعتوں کا جو فیصلہ تھا میرا بھی وہی ہے۔سابق وزیراعظم نے کہاہے کہ اتحادی حکومت اپنی مدت پوری کرے گی، عمران خان کو چاہیے تھا کہ اپوزیشن میں بیٹھ کر تنقید کرتے، پیٹرولیم مصنوعات کی قیمتیں بڑھانے کے علاوہ کوئی چوائس نہیں تھی، فیصلوں کی اونر شپ سب پاکستانیوں کو لینی پڑے گی۔
رہنما مسلم لیگ (ن)نے کہا کہ ٹرتھ کمیشن بنادیں اور تاریخ کو درست کردیں، پچھلی حکومت نے ایک میگا واٹ بجلی کا اضافہ نہیں کیا، چار سال کی خرابیاں ایک ماہ میں ٹھیک نہیں ہوسکتیں۔انہوں نے کہا کہ میں کسی کے ذاتی معاملات پر بولنا مناسب نہیں سمجھتا، اگر ان معاملات سے کرپشن کا ثبوت ملتا ہے تو اس کا پیچھا کرنا ہماری قانونی ذمے داری ہے۔شاہد خاقان عباسی نے کہا کہ عمران خان نے ہر ایک پر مقدمہ کیا، کچھ ثابت نہ کرسکے، قانون کو اپنے ذاتی مقاصد اور مفاد میں استعمال نہیں کرنا چاہتے، پہلے نیب قانون سے بالا تر ہو کر کام کرتا تھا، نیب نے کبھی کرپشن ثابت کی ہے؟