ارکان سے گن پوائنٹ پر اعتماد کا ووٹ لیا گیا: مریم نواز

 (24نیوز)  مسلم لیگ ن کی نائب صدرمریم نواز نے کہا ہے کہ عمران خان نے جھوٹا اعتماد کا ووٹ لے لیا، انہوں نے ارکان سے گن پوائنٹ پر اعتماد کاووٹ لیا، پورے اسلام آباد میں کل ڈسکہ کی طرح دھند چھاگئی۔حکومت کو بچانے والے پہلے اپنے ادارے کو بچائیں۔مریم اورنگزیب پر حملہ ہونے کے بعد 22 کروڑ عوام پی ٹی آئی کو شیم شیم کہہ رہے ہیں۔ آج ہر پاکستانی بیٹی اور ماں کا سر شرم سے جھک گیا۔

 میڈیا سے گفتگو کرتے ہوئے مریم نواز نے کہا کہ شاہد خاقان عباسی، احسن اقبال، مصدق ملک پر فخر ہے، مرتضیٰ جاویدعباسی اور خصوصاً مریم اورنگزیب پر فخر ہے، فخر ہے شیروں کی طرح ووٹ چوروں اور غنڈوں کا مقابلہ کیا، عوام کے شیر چند درجن برگرز پر بھی بھاری ہوتے ہیں، شیر شیر ہوتا ہے، گیدڑ گیدڑ ہوتا ہے۔انہوں نے مزید کہا کہ یہ جب اپوزیشن میں تھے تو پارلیمنٹ پر غنڈہ گردی کرتے تھے، آج یہ حکومت میں ہیں تو انہوں نے دوبارہ غنڈہ گردی کی، احسن اقبال پر جوتا پھینکا، بدترین بدتمیزی کا مظاہرہ کیا، مریم اورنگزیب پر حملہ کیا، 22 کروڑ عوام شیم شیم کہہ رہے ہیں، آج ہر پاکستانی بیٹی اور ماں کا سر شرم سے جھک گیا، مسلم لیگ (ن) لاوارث جماعت نہیں، غنڈہ گردی کا مقابلہ اخلاقیات سے نہیں کیا جاتا۔