سابق کھلاڑی سوچ سمجھ کر بات کیا کریں: بابر اعظم کے والد کی تنبیہ

(24 نیوز)پاکستان کرکٹ ٹیم کے سابق کپتان بابر اعظم کے والد اعظم صدیقی بیٹے کی حمایت میں پھر بول پڑے۔

سماجی رابطے کی ویب سائٹ ایکس پر جاری کیے گئے بیان میں اعظم صدیقی نے کہا ہے کہ آئی سی سی ٹی ٹونٹی ٹیم آف دی ایئر کے رکن اور کیپ ملنے کے بعد بابر اعظم ڈراپ ہوئے ہیں۔

اعظم صدیقی کا کہنا ہے کہ بابر اعظم نیشنل ٹی ٹونٹی اور پی ایس ایل میں پرفارم کر کے دوبارہ ٹیم میں آ جائیں گے، سابق کھلاڑیوں سے درخواست ہے کہ وہ الفاظ کا چناؤ ٹھیک رکھیں۔

بابر اعظم کے والد کا کہنا ہے کہ ایسا نہ ہو کہ کوئی پلٹ کر جواب دے تو برداشت نہ ہو، آپ ماضی ہیں دوبارہ نہیں کھیلیں گے۔

مزید پڑھیں:چیمپئنز ٹرافی: جنوبی افریقہ کے ڈیوڈ ملر نے تیز ترین سنچری کا ریکارڈ قائم کر دیا

 لوگ کہتے ہیں کہ باپ زیادہ بولتا ہے، میں بابر کا پہلا اور آخری کوچ ہوں۔

انہوں نے کہا کہ میں بابر اعظم کا ترجمان اور مینٹور بھی ہوں، میں سب سے زیادہ خیر خواہ باپ ہوں، جو چیخ و پکار کر رہے ہیں ان کی اپنے دور میں کیا کارکردگی رہی ہے؟

اعظم صدیقی کا یہ بھی کہنا ہے کہ پی سی بی کی ویب سائٹ ایک بار دیکھ لیا کریں، عقل مندوں کے لیے اشارہ کافی ہے۔

واضح رہے کہ 2 روز قبل نیوزی لینڈ کے خلاف ون ڈے اور ٹی ٹونٹی سیریز کے لیے پاکستان کےسکواڈز کا اعلان کیا گیا تھا۔

بابر اعظم کو ون ڈے سکواڈ میں تو شامل کیا گیا تھا تاہم انہیں ٹی ٹونٹی سکواڈ میں شامل نہیں کیا گیا۔