لیبیا کشتی حادثے میں ملوث اہم ملزم گجرات سے گرفتار

(24 نیوز) وفاقی تحقیقاتی ادارے (ایف آئی اے) نے لیبیا کشتی حادثہ کیس میں ملوث اہم ملزم کو گرفتار کر لیا۔ 

ترجمان ایف آئی اے کے مطابق ملزم عثمان خان کو گجرات سے گرفتار کیا گیا ہے اورگرفتار ملزم کا نام وزارت داخلہ کی ریڈ بک میں شامل تھا۔ 

ایف آئی اے حکام نے بتایا کہ ملزم نے یورپ بھجوانے کے لیے ایک شہری سے 24 لاکھ روپے وصول کیے تھے اور ملزم اس سے قبل درجنوں مقدمات میں ایف آئی اے کو مطلوب تھا۔

مزید پڑھیں: افغانستان سے پاکستان میں دراندازی کے مزید شواہد سامنے آ گئے

ترجمان کے مطابق گرفتار ملزم کو تھانہ ایف آئی اے منتقل کردیا گیا ہے جہاں ملزم سے مزید تحقیقات جاری ہے۔

واضح رہے کہ لیبیا میں 5 فروری کو  تارکین وطن کی کشتی کو حادثہ پیش آیا تھا جس کے نتیجے میں 16 پاکستانیوں کی ہلاکت ہوئی تھی۔