شہزاد رائے کا ملالہ یوسفزئی کیساتھ شطرنج مقابلہ، تصویر شیئر کر دی
Stay tuned with 24 News HD Android App
(ویب ڈیسک) معروف گلوکار و سماجی کارکن شہزاد رائے نے نوبل انعام یافتہ ملالہ یوسفزئی کے ساتھ شطرنج کا مقابلہ کرتے ہوئے تصویرسوشل میڈیاپر شیئر کر دی۔
فوٹو اینڈ ویڈیو شیئرنگ پلیٹ فارم انسٹاگرام پر شہزاد رائے نے ملالہ یوسفزئی کے ہمراہ گزارے دن کا احوال بیان کیا ہے،گزشتہ روز ملالہ یوسفزئی نے ایک سوشل میڈیا پوسٹ کے ذریعے بتایا تھا کہ انہوں نے شانگلہ میں واقع اپنے آبائی گاؤں کا دورہ کیا ہے۔
شہزاد رائے کے مطابق وہ بھی اس موقع پر ملالہ یوسف زئی، ان کے والد ضیاء الدین یوسفزئی، والدہ تور پیکئی اور شوہرعصر ملک کے ساتھ ان کے آبائی گاؤں برکانہ شاپور ضلع شانگلہ میں موجود تھے۔
معروف گلوکار نے انسٹاگرام پوسٹ میں ملک کی کم عمر نوبل انعام یافتہ ملالہ یوسف زئی کے ہمراہ شطرنج کا مقابلہ کرتے ہوئے تصویر شیئرکرتے ہوئے کیپشن میں لکھا کہ میں نے پہاڑوں کی ملکہ ملالہ کے ساتھ کوئینز گیمبٹ کھیلا۔
انہوں نے بتایا کہ کچھ روز قبل زندگی ٹرسٹ کی طالبہ مہک مقبول انڈر 18 نیشنل چیس چیمپئن بن گئی، جو اس بات کا ثبوت ہے کہ اگر موقع دیا جائے تو ہماری لڑکیاں مقابلہ کر سکتی ہیں اور جیت بھی سکتی ہیں، معیاری تعلیم ہی اصل گیم چینجر ہے۔
شہزاد رائے کے مطابق معیاری تعلیم چیمپئنز پیدا کرتی ہے، رکاوٹوں کو توڑ کر خوابوں کو حقیقت میں بدلتی ہے اور جب تعلیم کے حصول کے راستے میں آنے والی رکاوٹوں کو ہٹایا جاتا ہے تو ملالہ اور مہک جیسے نام سامنے آتے ہیں۔