باسکٹ بال میچ کے دوران مخالف پلیئر کی کہنی لگنے سے سربیا کے کھلاڑی کا گردہ ضائع ہوگیا

(ویب ڈیسک) باسکٹ بال میچ کے دوران مخالف پلیئر کی کہنی لگنے سے سربیا کے کھلاڑی کا گردہ ضائع ہوگیا۔
منیلا میں باسکٹ بال ورلڈ کپ میں 30 اگست کو سربیا اور جنوبی سوڈان کے میچ میں سربیا کے فارورڈ پلیئر بوریسا سیمانک حادثاتی طور پر جنوبی سوڈان کے پلیئر کی کہنی لگنے سے زخمی ہوگئے تھے۔
سربیا کی باسکٹ بال فیڈریشن نے گزشتہ روز اعلان کیا کہ اس واقعے میں انکے کھلاڑی بوریسا سیمانک اپنا ایک گردہ کھو چکے ہیں اور منیلا میں گزشتہ اتوار کو آپریشن کے بعد انکا ناکارہ ہونے والا گردہ نکال دیا گیا ہے،سیمانک بدھ کو جنوبی سوڈان کے خلاف سربیا کی جیت سے صرف 2 منٹ پہلے زخمی ہوئے تھے۔
جنوبی سوڈان کے کھلاڑی نونی اوموٹ باسکٹ کے نیچے گول کرنے کی کوشش کر رہے تھے کہ اس دوران انکی کہنی سیمانک کی پیٹ پر لگی جس سے وہ چند سیکنڈ بعد چیخ مارنے کے بعد گھٹنوں کے بل بیٹھ گئے۔نونی اوموٹ نے جنوبی سوڈان کی باسکٹ بال فیڈریشن کے توسط سے جاری بیان میں کہا کہ میں سیمانک کیساتھ پیش آنے والے واقعے پر بہت افسردہ ہوں اور ایک اسپورٹس مین کے طور پر اس صورتحال کی سنگینی کو سمجھتا ہوں،مجھے بہت افسوس ہے کہ ایسا ہوا سیمانک کی صحت یابی اور جلد واپسی کیلئے دعا گو ہوں۔دریں اثنا جنوبی سوڈان کی فیڈریشن نے کہاکہ اوموٹ کو اس واقعے کے بعد ہراسانی اور نسل پرستی کا نشانہ بنایا جارہا ہے جس کی شدید مذمت کرتے ہیں۔بیان میں کہا گیا کہ باسکٹ بال ایک ایسا کھیل ہے جو لوگوں کو یکجا کرنے کے لیے پہچانا جاتا ہے اسے تعصب کے آلے کے طور پر استعمال نہ کیا جائے۔

یہ بھی پڑھیں: تعلیمی اداروں میں تعطیل کا اعلان