ٹیکساس میں خسرہ کی وباء پھیل گئی، سینکڑوں کیسز رپورٹ

(ویب ڈیسک)امریکی ریاست ٹیکساس میں خسرہ کی وباء نے شدت اختیار کرلی، سینکڑوں کیسز سامنے آگئے۔

غیر ملکی ذرائع ابلاغ کے مطابق ٹیکساس میں اب تک 480 سے زائد خسرہ کے کیسز رپورٹ ہو چکے جبکہ امریکا بھر میں خسرہ سے اب تک 3 افراد لقمہ اجل بن چکے ہیں،رپورٹس کے مطابق خسرہ کے کیسز نیو میکسیکو، اوکلاہوما اور کنساس تک پھیل چکے ہیں۔

امریکی وزیرِ صحت رابرٹ ایف کینیڈی جونیئر کا اس حوالے سے کہنا ہے کہ رواں سال 600 سے زائد کیسز رپورٹ ہوئے، خسرہ کے پھیلاؤ کو روکنے کا سب سے مؤثر طریقہ MMR ویکسین ہے، امریکا 2000ء میں ملک سے خسرہ کے خاتمے کا اعلان کر چکا ہے۔

خیال رہے کہ اس سے قبل افریقی ملک انگولا میں ہیضے کی وباء پھیل گئی تھی، ہیضے کی وبا سے 108 افراد لقمہ اجل بن گئے تھے،وزارت صحت کا اس حوالے سے کہنا تھا کہ جنوری سے اب تک بیماری کے 3,147 کیسز کی تصدیق ہوچکی ہے جن میں نصف کا تعلق لوانڈا سے ہے۔

رپورٹس کے مطابق براعظم افریقہ کے جنوبی حصے کے مغربی وسطی ساحل پر واقع ملک انگولا میں گزشتہ چند دنوں میں ہیضے سے ہونے والی اموات بڑھ گئی ہیں۔

وزارت صحت کے مطابق گزشتہ پانچ دنوں میں اموات کی تعداد میں اضافہ ہوا ہے، انتہائی وسائل رکھنے کے باوجود اس غریب افریقی ملک میں صفائی ستھرائی کی صورتحال نا گفتہ بہ اور انتہائی ناقص ہے۔