ملک بھر میں گرج چمک کیساتھ بارش اور کئی مقامات پر ژالہ باری کی پیشگوئی

(روزینہ علی) محکمہ موسمیات نے ملک بھر میں گرج چمک کے ساتھ بارش اور کئی علاقوں میں ژالہ باریہ کی پیشگوئی کردی۔ 

محکمہ موسمیات نے آج رات موسم کی صورتحال کے حوالے سے کہا ہے کہ ملک کے بیشتر علاقوں میں موسم خشک رہنے تاہم بالائی خیبرپختونخوا، کشمیر اور ملحقہ پہاڑی علاقوں میں مطلع جزوی آبرآلود رہنے کے علاوہ تیز ہواؤں اور گرج چمک کے ساتھ چند مقامات پر ہلکی بارش ہو سکتی ہے۔

 منگل کے روز موسم کی پیشگوئی کرتے ہوئے موسم کا حال بتانے والوں نے سلام آباد اور گردونواح میں موسم خشک جبکہ دن کے اوقات میں گرم رہنے تاہم (شام/رات) مطلع جزوی آبرآلود رہنے کے علاوہ تیز ہواؤں، آندھی اور گرج چمک کے ساتھ چند مقامات پر بارش کا امکان ظاہر کیا ہے جبکہ اس دوران بعض مقامات پرژالہ باری بھی ہو سکتی ہے۔

خیبرپختونخوا کے بیشتر اضلاع میں موسم خشک جبکہ جنوبی اضلاع میں دن کے اوقات میں گرم رہنے   تاہم چترال، دیر، سوات، مالاکنڈ،شانگلہ، کوہستان، بٹگرام، مانسہرہ، ایبٹ آباد، ہری پور، بونیر، باجوڑ، مہمند، خیبر، اورکزئی، کرم، پشاور، چارسدہ، نوشہرہ، صوابی میں تیز ہواؤں اور گرج چمک کے ساتھ بارش اور بعض مقامات پر موسلادھار بارش  اور ژالہ باری کا بھی امکان ہے۔ 

پنجاب کے بیشتر اضلاع میں موسم گرم اورخشک رہنے  تاہم راولپنڈی، اٹک، چکوال، جہلم، تلہ گنگ، میانوالی، حافظ آباد، گوجرانوالہ، منڈی بہاؤالدین، گجرات، سیالکوٹ، نارووال، لاہور، شیخوپورہ، فیصل آباد میں تیز ہواؤں اور گرج چمک کے ساتھ بارش اور بعض مقامات پر ژالہ باری کا امکان ہے جبکہ مری ،گلیات اور گردونواح میں مطلع جزوی ابرآلود رہنے کے علاوہ تیز ہواؤں اور گرج چمک کے ساتھ بارش ہو سکتی ہے،جنوبی اوروسطی اضلاع میں دن کے درجہ حرارت معمول سے 03 سے06 ڈگری سینٹی گریڈ زیادہ رہنے کا بھی قوی امکان ہے۔ 

بلوچستان کے بیشتر اضلاع میں موسم خشک جبکہ جنوبی اضلاع میں دن کے اوقات میں گرم رہنے کا امکان  ہے،بعدازدوپہر بیشتر اضلاع میں مطلع جزوی ابرآلود رہنے کے علاوہ ژوب، موسیٰ خیل، بارکھان، قلعہ سیف اللہ، قلات، خضدار اور گردو نواح میں تیز ہواؤں اور گرج چمک کے ساتھ بارش کا بھی امکان ہے۔  

سندھ کے بیشتر اضلاع میں موسم شدید گرم اور خشک رہنے  اور درجہ حرارت معمول سے 04سے07 ڈگری سینٹی گریڈ زیادہ رہنے کا امکان ہے۔

دوسری جانب کشمیر اور گلگت بلتستان میں مطلع جزوی آبرآلود رہنے کے علاوہ تیز ہواؤں اور گرج چمک کے ساتھ چند مقامات پر بارش کا امکان ہے۔ 
 علاوہ ازیں، زیادہ سےزیادہ درجہ حرارت دادو، مو ہنجو داڑو، شہید بینظیر آباد، پڈ عیدن 47، خیرپور، روہڑی، لاڑکانہ 46، رحیم یار خان، سکرنڈ، جیکب آباد، مٹھی اورسکھر میں 45 ڈگری سینٹی گریڈ ریکارڈ کیا گیا۔

یہ  بھی پڑھیں : پنجاب میں 8 سے 11 اپریل تک بارشوں کی پیشگوئی