لاہور ایئرپورٹ پر دھند کا راج،پروازوں کا نظام درہم برہم 

(24نیوز)سول ایوی ایشن اتھارٹی نے لاہور ایئرپورٹ پر دھند کے باعث متعدد پروازیں منسوخ کردیں جبکہ 9 تاخیر کا شکار ہیں۔

تفصیلات کے مطابق موسم سرما کا آغاز ہوتے ہی پنجاب کے بیشتر علاقوں میں دھند کا راج شروع ہوجاتا ہے جس کے باعث پروازوں کا شیڈول شدید متاثر ہوتا ہے۔ایئرپورٹ پر دھند کے باعث 6 پروازیں منسوخ اور 9 ناخیر کا شکار ہیں، قومی ایئرلائن کی کراچی سے آنے والی پرواز پی کے 306، اور لاہور سے کراچی جانے والی پرواز پی کے307 منسوخ ہوگئی۔

ذرائع کے مطابق ایئرپورٹ حکام کی جانب سے دبئی جانے والی نجی ایئر لائن کی پرواز 416 جبکہ نجی ایئرلائن کی کراچی جانے والی پرواز 521 بھی منسوخ کردی گئی۔نجی ایئرلائن کی کراچی سے آنے والی پرواز 520، نجی ایئرلائن کی دبئی سے آنے والی پرواز 417 بھی منسوخ ہوگئی جبکہ غیر ملکی ایئر لائنز کی 9 پروازوں کی آمد اور روانگی میں بھی تاخیر سے ہوگی۔