سانحہ سیالکوٹ پر پوری قوم متحد۔ سستا راشن پروگرام لا رہے ہیں۔وزیر اطلاعات 

 (24نیوز)وفاقی وزیر اطلاعات فواد حسین چودھری نے کہا ہے کہ جنوری سے 30 فیصد سستا راشن پروگرام لا رہے ہیں، چینی کی قیمت میں تین سے چار روپے مزید کمی آ سکتی ہے،الیکٹرنک ووٹنگ مشین لانے کا مقصد صرف شفاف الیکشن کرانا ہے۔
 وفاقی کابینہ کے اجلاس کے بعد میڈیا سے گفتگو کرتے ہوئے وزیر اطلاعات نے کہاکہ سیالکوٹ واقعہ اسلامی تعلیمات کے منافی ہے، یہ پاکستان کا چہرا مسخ کرنے کے مترادف ہے، کابینہ نے اس سانحہ کی شدید مذمت کی۔ انہوں نے کہاکہ وزیراعظم اور کابینہ نے پنجاب حکومت کو ہدایت کی ہے کہ جو ملزم گرفتار ہو چکے ہیں ان کا ٹرائل جلد شروع کیا جائے اور انہیں قرار واقعی سزا دینے کیلئے اقدامات اٹھائے جائیں۔ انہوںنے کہاکہ ریاست اسلامی جمہوریہ پاکستان اقلیتوں سے تعلق رکھنے والے ہر فرد کے حقوق کے تحفظ کی پابند ہے۔
 وفاقی وزیر نے کہاکہ پاکستان کے معاشرے اور حکومت نے اس سانحہ پر جس طرح ردعمل کا اظہار کیا، اس سے ظاہر ہوتا ہے کہ ہم ہندوستان اور دیگر ممالک سے بہت مختلف ہیں۔ انہوںنے کہاکہ ہندوستان میں مسلمانوں کے خلاف اس طرح کے واقعات روز ہوتے ہیں لیکن وہاں پتہ تک نہیں ہل پاتا، سانحہ سیالکوٹ پر پوری قوم متحد ہے۔ وفاقی وزیر نے کہاکہ وزیراعظم نے بھی آج تقریب میں بتایا کہ اے پی ایس سانحہ کی طرح پوری قوم اس سانحہ پر بھی متحد ہے، پاکستان کا ہر شہری اس سانحہ کی مذمت کر رہا ہے۔ وفاقی وزیر نے کہاکہ ماضی میں مختلف وجوہات پر جو اقدامات نہیں اٹھائے جا سکے، ہم اس جانب آگے بڑھ رہے ہیں۔ وفاقی وزیر نے کہاکہ کابینہ کو ای وی ایم پر بریفنگ دی گئی، الیکشن کمیشن کو ای وی ایم کے حوالے سے اپنی تسلی کرنی چاہئے۔ وزیر اطلاعات نے کہاکہ الیکشن کمیشن سمیت ہر شخص کے لئے ای وی ایم کا نظام سمجھنا ضروری ہے، سمجھے بغیر تنقید اور اسے مسترد کرنے پر ہمارا اعتراض بنتا ہے۔ وفاقی وزیر نے کہاکہ الیکشن کمیشن نے جو شرائط دی تھیں، اس کے مطابق اپنا ٹینڈر کر دے، دنیا میں مینوفیکچررز ای وی ایم لے آئیں گے، ہم اس پر عمل درآمد کرلیں گے، ای وی ایم لانے کا مقصد ملک میں صاف اور شفاف انتخابات کا انعقاد ہے۔ 
انہوں نے کہاکہ ن لیگ اور پی پی پی نے جس طرح اوورسیز پاکستانیوں کو ووٹ کا حق دینے کے خلاف مہم چلائی، یہ سیاسی خودکشی ہے، ایسے لگتا ہے کہ اوورسیز پاکستانیوں کی ذمہ داری صرف پی ٹی آئی پر ہے۔ وزیر اطلاعات نے کہاکہ ہم اوورسیز پاکستانیوں کو ووٹ کا حق دینا چاہتے ہیں، یہ ہمارے منشور میں بھی شامل ہے۔ وزیر اطلاعات نے کہاکہ نواز شریف کی پوری فیملی بیرون ملک مقیم ہے، حسن اور حسین کا موقف ہے کہ ان پر پاکستانی قانون لاگو ہی نہیں ہوتا، ایسے لگتا ہے کہ انہوں نے پاکستانی پاسپورٹ پھاڑ کر پھینک دیا ہے۔ چودھری فواد حسین نے کہاکہ ہم حسن اور حسین کو بھی موقع دینا چاہتے ہیں کہ وہ بھی یہاں اپنے پاپا کی پارٹی کو ووٹ دے سکیں۔ انہوں نے کہاکہ بلاول بھٹو نے پوری زندگی باہر گذاری، اوورسیز پاکستانیوں کو ووٹنگ کا حق دینے کے خلاف ان کی مخاصمت کی وجہ نظر نہیں آتی۔ وزیر اطلاعات نے کہا کہ ہماری پارٹی کا منشور ہے کہ ہم اوورسیز پاکستانیوں کو ووٹنگ کا حق دیں گے اور یہ حق انہیں ضرور ملے گا۔ وفاقی وزیر نے کہ اکہ انتہا پسند نظریات کی حامل جماعتیں کسی صورت مرکزی دھارے میں نہیں آ سکتیں۔ وفاقی وزیر نے کہاکہ چودھری سرور کا بیان سیاق و سباق سے ہٹ کر چلایا گیا، میڈیا کو کابینہ کی خبریں ذرائع سے نہیں چلانی چاہئیں۔ وفاقی وزیر نے کہاکہ ملک بھر میں اشیائے ضروریہ کی قیمتوں میں کمی کا رجحان ہے، چینی کی قیمتوں میں کمی کا رجحان جاری ہے، ماسوائے اسلام آباد اور کراچی ملک بھر میں چینی 90 روپے کلو میں دستیاب ہے۔
 یہ بھی پڑھیں۔اداکارہ نمرہ خان کی دلکش ادائیں ۔۔۔ویڈیو سوشل میڈیا پر وائرل